नवी दिल्ली, 11 सप्टेंबर (हिं.स.)। देशाच्या ऑनलाइन किरकोळ बाजारपेठेत फ्लिपकार्टच्या क्विक कॉमर्स सेवेने फ्लिपकार्ट मिनिट्सने लाँचिंगनंतर वेगाने विस्तार करत वार्षिक आधारावर चार पटीने वाढ नोंदवली आहे. गेल्या दोन वर्षांत प्लॅटफॉर्मचे नेटवर्क १५० हून अधिक शहरांमध्ये विस्तारले असून, सुमारे १२०० मायक्रो फुलफिलमेंट सेंटर्सपर्यंत पोहोचले आहे.

या प्लॅटफॉर्मने सुरुवातीपासून आतापर्यंत चार लाखांहून अधिक प्रत्यक्ष आणि अप्रत्यक्ष रोजगाराच्या संधी निर्माण केल्या आहेत. कंपनीने सांगितले की, या वाढीत टियर २ प्लस बाजारपेठांची महत्त्वाची भूमिका दिसून येत आहे. अंबाला, बाराबंकी, भागलपूर, दुर्गापूर, कानपूर, रुडकी, सिलीगुडी, सेलम आणि तिरुप्पूर यांसारख्या शहरांमध्ये ग्राहकसंख्या वार्षिक आधारावर सुमारे २५ पटीने वाढली आहे. या बाजारपेठांमधील मागणी आता केवळ दैनंदिन गरजांपुरती मर्यादित राहिलेली नाही. कोरियन नूडल्स, सॉस आणि रेडी-टू-ईट मील्स यांसारख्या उत्पादनांसोबतच प्रीमियम स्किनकेअर आणि पर्सनल केअर श्रेणींमध्येही मजबूत मागणी दिसून येत आहे.

जेन झीच्या वाढत्या सहभागामुळे क्विक कॉमर्सचा विस्तार

कंपनीने सांगितले की, फ्लिपकार्ट मिनिट्सवर जेन झेड हा सर्वाधिक वेगाने वाढणारा ग्राहकवर्ग म्हणून समोर आला आहे. गेल्या १२ महिन्यांत या वर्गाची ग्राहकसंख्या वार्षिक आधारावर सुमारे पाच पटीने वाढली आहे. ब्युटी, इलेक्ट्रॉनिक्स, गेमिंग, वेअरेबल्स, फ्रेगरन्स, हेल्थ अँड न्यूट्रिशन आणि ग्रूमिंग यांसारख्या श्रेणींमध्ये ४५ टक्क्यांहून अधिक ऑर्डर्स जेन झेड ग्राहकांकडून केल्या जातात. याशिवाय प्लॅटफॉर्मवरील गॉरमेट श्रेणीतील प्रत्येक तीनपैकी एक ऑर्डर जेन झी ग्राहकांकडून केली जाते. कंपनीच्या म्हणण्यानुसार, या आकडेवारीवरून दिसून येते की ही पिढी क्विक कॉमर्सचा वापर दैनंदिन गरजांपासून प्रीमियम आणि लाइफस्टाइलशी संबंधित विविध श्रेणींमधील उत्पादनांच्या खरेदीसाठी करत आहे.

कंपनीचे वरिष्ठ उपाध्यक्ष आणि प्रमुख कुणाल गुप्ता यांनी सांगितले की, गेल्या दोन वर्षांत फ्लिपकार्ट मिनिट्स केवळ सुविधा देणारी सेवा न राहता खरेदीचे व्यापक प्लॅटफॉर्म म्हणून विकसित झाले आहे. ग्राहक आता दैनंदिन गरजांसोबतच विविध प्रकारच्या उत्पादनांच्या खरेदीसाठीही याचा वापर करत आहेत. विशेष बाब म्हणजे खरेदीचा हा कल मोठ्या शहरांबाहेरही वेगाने वाढत आहे. त्याचबरोबर जेन झेड ग्राहक प्लॅटफॉर्मवर नवीन श्रेणीतील उत्पादनांची खरेदी करत असून, खरेदीच्या नव्या संधीही निर्माण करत आहेत. वाढत्या नेटवर्कच्या माध्यमातून देशभरातील अधिकाधिक ग्राहकांपर्यंत हा अनुभव पोहोचवण्यासोबतच ब्रँड्स, शेतकरी आणि स्थानिक व्यवसायांना ग्राहकांपर्यंत पोहोचण्याच्या नव्या संधी उपलब्ध करून देण्याची मोठी क्षमता आमच्याकडे आहे.

भारताची बदलती शॉपिंग बास्केट

कंपनीने सांगितले की, दैनंदिन गरजा आणि फळे-भाज्यांसोबतच फ्लिपकार्ट मिनिट्सवर प्रीमियम आणि एस्पिरेशनल श्रेणींमध्येही मजबूत वाढ दिसून येत आहे. गेल्या एका वर्षात सुरू करण्यात आलेल्या गॉरमेट आणि स्पेशालिटी ग्रोसरी श्रेणीमध्ये आठ पटीने वाढ झाली आहे. यामध्ये कोल्ड-प्रेस्ड ऑइल, इम्पोर्टेड चीज, एवोकाडोच्या आंतरराष्ट्रीय जाती आणि कोरियन रेडी-टू-ईट मील्सची मागणी दिसून येत आहे. मेन्स ग्रूमिंग श्रेणीमध्ये वार्षिक आधारावर सुमारे सहा पटीने वाढ झाली आहे, तर पेट फूड श्रेणीत पाच पटीने वाढ झाली आहे. क्विक कॉमर्सच्या माध्यमातून ग्राहकांकडून खरेदी केल्या जाणाऱ्या उत्पादनांच्या वाढत्या विविधतेचे हे चित्र आहे.

भारतासाठी उभारणी : पार्टनर्स, शेतकरी आणि पर्यावरणपूरक उपक्रम

फ्लिपकार्टने सांगितले की, ऑगस्ट २०२४ पासून आतापर्यंत फ्लिपकार्ट मिनिट्सने सुमारे ५०० डीटूसी ब्रँड्सचे पार्टनर इकोसिस्टम तयार केले आहे. त्यामुळे या ब्रँड्सना हायपरलोकल मागणी आणि नव्या ग्राहकवर्गापर्यंत पोहोचण्याची संधी मिळाली आहे. किसान प्रोड्युसर ऑर्गनायझेशन्स अर्थात एफपीओंसोबतच्या भागीदारीच्या माध्यमातून प्लॅटफॉर्मने हजारो शेतकऱ्यांना थेट ग्राहकांशी जोडले आहे. यामुळे शेतकऱ्यांना नव्या बाजारपेठांपर्यंत पोहोचण्यास आणि आपल्या उत्पादनाला चांगला दर मिळवण्यास मदत झाली आहे.

फ्लिपकार्ट मिनिट्स अधिक सस्टेनेबल डिलिव्हरी नेटवर्क तयार करण्याच्या दिशेनेही काम करत आहे. आता लास्ट-माइल डिलिव्हरीचा वाढता हिस्सा इलेक्ट्रिक वाहनांच्या माध्यमातून पूर्ण केला जात आहे आणि मायक्रो फुलफिलमेंट सेंटर्समध्ये बॅटरी-स्वॅपिंग पायाभूत सुविधांचा वापर केला जात आहे. प्लॅटफॉर्मने प्रमुख फळे आणि भाजीपाला श्रेणींसाठी हलके कंपोस्टेबल आणि बायोडिग्रेडेबल पॅकेजिंगही सुरू केले आहे. त्यामुळे व्हर्जिन प्लास्टिकचा वापर कमी करण्यास मदत होत आहे.

---------------

हिंदुस्थान समाचार / Suraj Chaugule