नवी दिल्ली, 12 सप्टेंबर (हिं.स.)। काँग्रेस अध्यक्ष मल्लिकार्जुन खरगे यांनी एका वृत्तपत्रात गुजरातमधील दूषित पाण्याबाबत प्रकाशित झालेल्या वृत्ताचा हवाला देत टोला लगावला की, पंतप्रधान नरेंद्र मोदी यांच्या ‘हर घर जल’चे दावे दूषित पाण्यात वाहून गेले आहेत.

खरगे यांनी शनिवारी ‘एक्स’वर म्हटले की, गुजरातमध्ये अनेक दशकांपासून भाजपची सत्ता आहे, मात्र दहापैकी नऊ पाण्याचे नमुने पिण्यायोग्य नसल्याचे आढळून आले आहे. त्यांनी दावा केला की, मोदी गुजरातचे मुख्यमंत्री असताना २००४ मध्ये ‘सुजलाम-सुफलाम’ योजनेचा प्रचार करण्यात आला होता. मात्र, आजही गुजरातची जनता थेंबथेंब पाण्यासाठी त्रस्त आहे.

काँग्रेस अध्यक्षांनी म्हटले की, पंतप्रधान झाल्यानंतर हेच दावे ‘जल जीवन मिशन’पर्यंत पोहोचले. त्यांनी नियंत्रक आणि महालेखापरीक्षक अर्थात ‘कॅग’च्या अहवालाचा हवाला देत दावा केला की, गुजरात सरकारने २०२२ मध्ये केलेल्या १०० टक्के नळ जोडणीच्या दाव्याचीही पोलखोल झाली असून, सुमारे १४ लाख कुटुंबे आजही पाण्याची प्रतीक्षा करत आहेत.

खरगे यांनी अहमदाबाद जिल्ह्यातील धोलका येथे दूषित पाण्याबाबत समोर आलेल्या वृत्ताचाही उल्लेख केला. त्यांनी दावा केला की, गेल्या आठवड्यातच दूषित पाणी प्यायल्यामुळे कर्करोगाने ५४ जणांचा मृत्यू झाल्याचे वृत्त समोर आले होते. त्यांनी म्हटले की, सौराष्ट्रातील राजकोट आणि जामनगरसारखे भागही आजपर्यंत पिण्याच्या पाण्यासाठी त्रस्त आहेत, तर कच्छ-सौराष्ट्रातील शेतकरी दुष्काळाच्या समस्येला सामोरे जात आहेत. त्यांनी सरकारवर गुजरातच्या जनतेला २०४७ सालच्या विकसित भारताचे स्वप्न दाखवून गेल्या २८ वर्षांत केवळ प्रचार केल्याचा आरोप केला. वास्तविक समस्यांमधून जनतेची सुटका करण्याऐवजी खोटा प्रचार आणि रंगीत छायाचित्रे दाखवून तिच्या डोळ्यात धूळफेक करण्यात आली, असे त्यांनी म्हटले.

---------------

हिंदुस्थान समाचार / Suraj Chaugule