रायगड, 14 सप्टेंबर (हिं.स.)।

रोहा-पालदाड मार्गावरील उडदवणे पालदाड पुलाजवळ रविवारी दुपारी कार आणि दुचाकीची समोरासमोर धडक होऊन भीषण अपघात झाला. या अपघातात दुचाकीस्वार तरुण गंभीर जखमी झाला असून त्याला तातडीने रुग्णालयात दाखल करण्यात आले आहे.

मिळालेल्या माहितीनुसार, संबंधित तरुण हिरो स्प्लेंडर प्लस दुचाकीवरून जात असताना समोरून वेगाने येणाऱ्या मारुती सुझुकी बलेनो कारशी त्याची जोरदार धडक झाली. धडक इतकी भीषण होती की दुचाकीच्या पुढच्या भागाचा अक्षरशः चक्काचूर झाला, तर बलेनो कारच्या डाव्या बाजूचा बंपर आणि हेडलाईटचेही मोठे नुकसान झाले.

अपघाताचा आवाज ऐकताच स्थानिक नागरिकांनी घटनास्थळी धाव घेतली आणि रक्तबंबाळ अवस्थेत पडलेल्या तरुणाला रुग्णवाहिकेद्वारे तातडीने रुग्णालयात हलवले. घटनेची माहिती मिळताच पोलिसांनी घटनास्थळी पोहोचून पंचनामा केला असून पुढील तपास सुरू आहे. या घटनेमुळे पालदाड मार्गावरील वाहतूक सुरक्षेचा प्रश्न पुन्हा एकदा ऐरणीवर आला आहे.

---------------

हिंदुस्थान समाचार / संदेश साळुंके (रायगड)