नवी दिल्ली, 15 सप्टेंबर (हिं.स.)भारतीय रिकर्व्ह तिरंदाज धीरज बोम्मादेवराने मेक्सिकोमधील साल्टिलो येथे झालेल्या तिरंदाजी विश्वचषक अंतिम सामना २०२६ मध्ये पुरुषांचे वैयक्तिक विजेतेपद पटकावून इतिहास रचला. धीरजने एका रोमांचक शूट-ऑफ सुवर्णपदकाच्या सामन्यात जपानच्या नाकानिशी जुन्याचा ६-५ असा पराभव केला. तिरंदाजी विश्वचषक अंतिम सामन्यात वैयक्तिक विजेतेपद पटकावणारा तो पहिला भारतीय पुरुष रिकर्व्ह तिरंदाज ठरला आहे. ही कामगिरी करणारा धीरज बोम्मादेवर हा दुसरा भारतीय तिरंदाज आहे. त्याच्या आधी, डोला बॅनर्जीने २००७ मध्ये दुबई येथे महिलांचे रिकर्व्ह विजेतेपद पटकावले होते. या हंगामातील अंतिम विश्वचषक स्पर्धेत बोम्मादेवर हा भारताचा एकमेव सहभागी खेळाडू होता. पुरुष आणि महिलांच्या रिकर्व्ह आणि कंपाऊंड स्पर्धांमध्ये प्रत्येकी आठ तिरंदाजांनी भाग घेतला होता.

साल्टिलो येथील अंतिम सामन्यात धीरज आणि नाकानिशी यांच्यात पाच सेटची चुरशीची लढत झाली.पहिला सेट २८-२८ असा बरोबरीत होता, तर दुसऱ्या सेटमध्ये जपानी तिरंदाजाने २९-२८ अशी आघाडी घेतली. धीरजने तिसरा सेट २९-२८ ने जिंकून पुनरागमन केले, पण नाकानिशीने चौथा सेट ३०-२८ ने जिंकून पुन्हा आघाडी मिळवली.शूट-ऑफमध्ये पोहोचण्यासाठी पाचवा सेट जिंकणे आवश्यक होते. धीरजने आपला संयम राखला आणि तो २८-२७ ने जिंकून सामना ५-५ असा बरोबरीत आणला.

त्यानंतर दोन्ही तिरंदाजांनी दबावाखाली उत्कृष्ट कामगिरी केली, पण धीरजच्या १०-पॉइंट शॉटने नाकानिशीच्या ९-पॉइंट शॉटवर मात केली आणि आपल्या कारकिर्दीतील सर्वात मोठे वैयक्तिक विजेतेपद पटकावले. या विजयासह, दुसऱ्या क्रमांकाच्या भारतीय खेळाडूने आठ खेळाडूंच्या या स्पर्धेत एक उल्लेखनीय कामगिरी पूर्ण केली.धीरज बोम्मादेवराने तुर्कस्तानच्या ऑलिम्पिक पदक विजेता बर्किम टुमेरविरुद्ध उपांत्यपूर्व फेरीच्या सामन्याची सुरुवात वर्चस्वपूर्ण कामगिरीने केली आणि केवळ एक सेट पॉइंट गमावून ७-१ ने विजय मिळवला.

उपांत्य फेरीत त्याने फ्रान्सच्या दोन वेळच्या ऑलिम्पिक रौप्य पदक विजेता जीन-चार्ल्स वॅलाडोंटविरुद्ध आपले वर्चस्व कायम ठेवत ७-१ ने विजय मिळवला आणि सुवर्णपदकाच्या सामन्यात प्रवेश केला.चौथे मानांकित नाकानिशीने उपांत्यपूर्व फेरीच्या शूटआऊटमध्ये इटलीच्या माउरो नेस्पोलीचा ६-५ ने पराभव केला. त्यानंतर त्याने उपांत्य फेरीत अव्वल मानांकित आणि ऑलिम्पिक विजेता तुर्कस्तानच्या मेटे ग्योझचा ६-० ने पराभव करून एक मोठा उलटफेर घडवला. २०२३ आणि २०२४ च्या विश्वचषक अंतिम फेरीत एकही पदक न मिळवता परतल्यानंतर धीरज बोम्मादेवराला हा विजय मिळाला.

या भारतीय खेळाडूने अंताल्या येथे झालेल्या विश्वचषकाच्या तिसऱ्या टप्प्यात पुरुषांच्या वैयक्तिक रिकर्व्ह प्रकाराचे विजेतेपद जिंकून अंतिम फेरीसाठी पात्रता मिळवली. तिथे त्याने कुमकुम मोहोडसोबत मिश्र सांघिक प्रकारात सुवर्णपदकही जिंकले होते. या हंगामात, भारताने पुएब्ला, शांघाय, अंताल्या आणि माद्रिद येथे झालेल्या तिरंदाजी विश्वचषकाच्या चार टप्प्यांमध्ये चार सुवर्णांसह एकूण सात पदके जिंकली. तथापि, अंताल्यामधील विजयानंतर धीरज बोम्मादेवरा हा देशाचा एकमेव वैयक्तिक सुवर्णपदक विजेता ठरला. गेल्या वर्षी, शांघाय येथील विश्वचषक अंतिम फेरीत भारताला एकमेव पदक ज्योती सुरेखा वेन्नम हिने मिळवले होते, जिने महिलांच्या कंपाऊंड प्रकारात रौप्यपदक जिंकले होते.

---------------

हिंदुस्थान समाचार / वृषाली देशपांडे