-झिम्बाब्वेचा यष्टीरक्षक ब्रेंडन टेलर सर्वाधिक काळ एकदिवसीय क्रिकेट खेळणारा क्रिकेटपटू

हरारे, 15 सप्टेंबर (हिं.स.)झिम्बाब्वेचा अनुभवी क्रिकेटपटू ब्रेंडन टेलरने हरारेमध्ये ऑस्ट्रेलियाविरुद्धच्या पहिल्या एकदिवसीय सामन्यासाठी मैदानात उतरून इतिहास रचला. त्याने भारताचा महान क्रिकेटपटू सचिन तेंडुलकरला मागे टाकत, पुरुष एकदिवसीय क्रिकेटच्या इतिहासातील सर्वाधिक काळ क्रिकेट खेळणारा क्रिकेटपटू बनण्याचा मान मिळवला. टेलरची एकदिवसीय कारकीर्द आता २२ वर्षे आणि १४६ दिवसांची झाली असून, त्याने तेंडुलकरला मागे टाकले आहे. १९८९ मध्ये एकदिवसीय क्रिकेटमध्ये पदार्पण करणाऱ्या तेंडुलकरची कारकीर्द २२ वर्षे आणि ९१ दिवसांची होती आणि त्याने २०१२ मध्ये या प्रकारातून निवृत्ती घेतली होती.

झिम्बाब्वे ऑस्ट्रेलियाचे तीन सामन्यांच्या एकदिवसीय मालिकेसाठी यजमानपद भूषवत आहे. पहिल्या सामन्यात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला. पण सर्वाधिक एकदिवसीय धावा (१८,४२६) आणि सर्वाधिक सामने खेळण्याचा (४६३) विक्रम अजूनही तेंडुलकरच्या नावावर आहे. ४० वर्षीय टेलरने २००४ मध्ये एकदिवसीय क्रिकेटमध्ये पदार्पण केले आणि तो झिम्बाब्वेच्या आघाडीच्या फलंदाजांपैकी एक बनला. सामन्यापूर्वी, त्याने २०७ सामन्यांमध्ये ११ एकदिवसीय शतके झळकावली होती, जो एक राष्ट्रीय विक्रम आहे.

एकदिवसीय क्रिकेटमधील सर्वात प्रदीर्घ कारकीर्द (पुरुष)

२२ वर्षे १४६ दिवस - ब्रेंडन टेलर (झिम्बाब्वे, २००४–)

२२ वर्षे ९१ दिवस - सचिन तेंडुलकर (भारत, १९८९–२०१२)

२१ वर्षे १८४ दिवस - सनथ जयसूर्या (श्रीलंका, १९८९–२०११)

२० वर्षे २७२ दिवस - जावेद मियाँदाद (पाकिस्तान, १९७५–९६)

२० वर्षे १८७ दिवस - शॉन विल्यम्स (झिम्बाब्वे, २००५–२०२५)

टेलरने २०२१ मध्ये आंतरराष्ट्रीय क्रिकेटमधून निवृत्ती घेतली. पण आयसीसीच्या भ्रष्टाचारविरोधी आणि उत्तेजक द्रव्यविरोधी नियमांचे उल्लंघन केल्याबद्दल २०२२ मध्ये त्याच्यावर साडेतीन वर्षांची बंदी घालण्यात आली. दक्षिण आफ्रिका आणि नामिबियासोबत झिम्बाब्वे २०२७ च्या एकदिवसीय विश्वचषक स्पर्धेचे यजमानपद भूषवण्याच्या तयारीत असताना, त्याने आपली बंदीची शिक्षा भोगून २०२५ मध्ये निवृत्तीतून पुनरागमन केले.

---------------

हिंदुस्थान समाचार / वृषाली देशपांडे