वॉशिंग्टन , 16 सप्टेंबर (हिं.स.)।अमेरिकेतील लॉस एंजेलिस शहराच्या बाहेरील परिसरात एका हेलिकॉप्टरला अपघात झाला. शहराच्या अग्निशमन विभागाने दिलेल्या माहितीनुसार, या दुर्घटनेत तीन जणांचा मृत्यू झाला आहे.

वृत्तानुसार, लॉस एंजेलिस अग्निशमन विभागाच्या (एलएएफडी) प्रवक्त्याने सांगितले की, हे हेलिकॉप्टर चॅट्सवर्थ परिसरातील दोन व्यावसायिक इमारतींच्या मधोमध कोसळले. एका व्यक्तीला स्थानिक रुग्णालयात दाखल करण्यात आले असून, त्यांची प्रकृती अद्याप स्पष्ट झालेली नाही.

हेलिकॉप्टर कोण चालवत होते, हे तत्काळ स्पष्ट होऊ शकले नाही. मात्र, स्थानिक माध्यमांच्या वृत्तानुसार, हे एक वृत्तवाहिनीचे हेलिकॉप्टर होते. जीवघेण्या बस अपघाताच्या घटनास्थळाजवळून उड्डाण करत असताना हे हेलिकॉप्टर दुर्घटनाग्रस्त झाले.या दुर्घटनेचा व्हिडिओही समोर आला आहे. बस अपघाताचे वृत्तांकन करण्यासाठी गेलेले माध्यमांचे हेलिकॉप्टरच दुर्घटनाग्रस्त झाल्याचे व्हिडिओमध्ये दिसत आहे.

घटनास्थळावरील दृश्यांमध्ये दोन मालवाहू कंटेनर आणि अनेक वाहने जळताना दिसत आहेत. अग्निशमन विभागाने दिलेल्या माहितीनुसार, आग आटोक्यात आणण्यात आली आहे. दुर्घटनेत मृत्यू झालेल्यांपैकी काही जण हेलिकॉप्टरमध्ये होते की बाहेर, हे अद्याप स्पष्ट झालेले नाही.

लॉस एंजेलिस अग्निशमन विभागाचे प्रवक्ते कॅप्टन ब्रँडन सिल्व्हरमन यांनी पत्रकार परिषदेत सांगितले की, मृतांपैकी किमान एक व्यक्ती हेलिकॉप्टरच्या बाहेर पार्किंग परिसरात होती. ते म्हणाले, “हेलिकॉप्टरमध्ये किती जण होते, याचा आम्ही शोध घेत आहोत.”सिल्व्हरमन यांनी पुढे सांगितले, “हेलिकॉप्टर पूर्णपणे उद्ध्वस्त झाले आहे. मलब्याची तपासणी केल्यानंतरच त्यात किती जण होते, हे स्पष्ट होईल.”

अग्निशमन विभागाच्या माहितीनुसार, हेलिकॉप्टर दुर्घटनेनंतर ५० हून अधिक अग्निशमन कर्मचारी घटनास्थळी दाखल झाले. अधिकाऱ्यांनी सांगितले की, आगीमुळे चार वाहने आणि दोन साठवणूक कंटेनरचे नुकसान झाले. मात्र, मंगळवारी संध्याकाळपर्यंत आगीवर पूर्णपणे नियंत्रण मिळवण्यात आले.

--------------

हिंदुस्थान समाचार / Priyanka Bansode