मुंबई, 19 सप्टेंबर (हिं.स.)। अजय देवगणच्या चाहत्यांसाठी एकीकडे निराशाजनक, तर दुसरीकडे मोठी आनंदाची बातमी समोर आली आहे. वृत्तांनुसार, त्याचा बहुप्रतिक्षित चित्रपट ‘रेंजर’चे प्रदर्शन सध्या पुढे ढकलण्यात आले आहे. त्याचवेळी रोहित शेट्टीच्या लोकप्रिय विनोदी चित्रपट मालिकेतील पाचवा भाग ‘गोलमाल ५’च्या प्रदर्शनाची तारीख निश्चित झाली आहे. अजय देवगण पुन्हा एकदा मोठ्या पडद्यावर प्रेक्षकांना हसवताना दिसणार आहे.

मार्च २०२७ मध्ये ईदनंतर प्रदर्शित होणार ‘रेंजर’

वृत्तांनुसार, जगन शक्ती यांच्या दिग्दर्शनाखाली तयार झालेला ‘रेंजर’ यापूर्वी ४ डिसेंबर २०२६ रोजी चित्रपटगृहात प्रदर्शित होणार होता. आता या चित्रपटाचे प्रदर्शन मार्च २०२७ मध्ये ईदनंतर होण्याची शक्यता आहे. लव रंजन निर्मित या जंगल-साहसपटात अजय देवगण वन अधिकाऱ्याच्या भूमिकेत दिसणार आहे. या भूमिकेत तो सिंहांचे संरक्षण करताना दिसेल. चित्रपटात संजय दत्त आणि तमन्ना भाटिया यांच्याही महत्त्वाच्या भूमिका आहेत.

८ जानेवारी २०२७ रोजी येणार ‘गोलमाल ५’

दरम्यान, रोहित शेट्टी यांच्या दिग्दर्शनाखाली तयार होत असलेल्या ‘गोलमाल ५’च्या प्रदर्शनाची तारीख निश्चित करण्यात आली आहे. हा चित्रपट ८ जानेवारी २०२७ रोजी चित्रपटगृहात प्रदर्शित होणार आहे. यावेळी अजय देवगणसोबत अक्षय कुमारही ‘गोलमाल’ गँगचा भाग असणार आहे. चित्रपटात अरशद वारसी, श्रेयस तळपदे, कुणाल खेमू, तुषार कपूर आणि शर्मन जोशी हे कलाकारही दिसणार आहेत. चित्रपटाचे चित्रीकरण २०२६ मध्ये सुरू होणार असल्याची माहिती समोर आली आहे.

दशकभरानंतर परतणार ‘गोलमाल’ मालिका

‘गोलमाल ५’च्या माध्यमातून जवळपास दशकभरानंतर ही लोकप्रिय चित्रपट मालिका पुन्हा प्रेक्षकांच्या भेटीला येणार आहे. यापूर्वी २०१७ मध्ये ‘गोलमाल अगेन’ प्रदर्शित झाला होता. या चित्रपट मालिकेची सुरुवात २००६ मध्ये ‘गोलमाल : फन अनलिमिटेड’पासून झाली होती. त्यानंतर २००८ मध्ये ‘गोलमाल रिटर्न्स’ आणि २०१० मध्ये ‘गोलमाल ३’ प्रदर्शित झाला. आता रोहित शेट्टी पाचव्या भागासह पुन्हा एकदा आपली विनोदी टीम मोठ्या पडद्यावर घेऊन येत आहेत.

---------------

हिंदुस्थान समाचार / Suraj Chaugule