नागोया (जपान), 23 सप्टेंबर (हिं.स.)जपानमधील आयची येथे झालेल्या आशियाई खेळ २०२६ च्या उपांत्य फेरीत चीनकडून ३-१ असा पराभव पत्करल्यानंतर भारतीय पुरुष बॅडमिंटन संघाने कांस्यपदक जिंकले. सात्विकसाईराज रँकीरेड्डी आणि चिराग शेट्टी यांनी पुरुष दुहेरीच्या सामन्यात विद्यमान जागतिक विजेते लियांग वेईकेंग आणि वांग चांग यांचा २१-११, २२-२० असा पराभव करून या लढतीत भारताचा एकमेव विजय नोंदवला.

लक्ष्य सेनला सुरुवातीच्या सामन्यात शी युकीकडून २१-१६, २१-१८ असा पराभव स्वीकारावा लागला. लक्ष्यने दमदार सुरुवात केली होती, परंतु शीने जोरदार पुनरागमन करत पहिला गेम जिंकला. दुसऱ्या गेममध्येही भारतीय खेळाडूने कडवी झुंज दिली आणि १६-१६ अशी बरोबरी साधली, मात्र अखेरीस चिनी खेळाडूने सामना जिंकला.

आशियाई खेळांमधील पुरुष दुहेरीचे विद्यमान विजेते असलेल्या सात्विक आणि चिराग यांनी जागतिक क्रमवारीत तिसऱ्या स्थानावर असलेल्या चिनी जोडीविरुद्ध उत्कृष्ट कामगिरी केली. भारतीय जोडीने पहिल्या गेममध्ये वर्चस्व गाजवले. दुसऱ्या गेममध्ये चिनी जोडीने दोन मॅच पॉइंट्स वाचवून गुणसंख्या २०-२० अशी बरोबरीवर आणली होती, तरीही भारतीय जोडीने संयम राखला. सात्विक-चिराग यांनी तिसऱ्या मॅच पॉइंटचे विजयात रूपांतर करत लढत १-१ अशी बरोबरीवर आणली.

त्यानंतर आयुष शेट्टीचा जागतिक क्रमवारीत १२ व्या स्थानावर असलेल्या ली शी फेंगकडून २१-१९, २१-१३ असा पराभव झाला, ज्यामुळे चीनला २-१ अशी आघाडी मिळाली.चौथ्या सामन्यात विजयाची गरज असताना, हरिहरन अमसाकरुणन आणि एम.आर. अर्जुन यांचा सामना हे जी टिंग आणि लिऊ यी यांच्याशी झाला. मात्र, भारतीय जोडीचा २१-१६, १७-२१, २१-९ असा पराभव झाला आणि सलग दुसऱ्यांदा पुरुष सांघिक स्पर्धेच्या अंतिम फेरीत पोहोचण्याचे भारताचे स्वप्न भंगले.

उपांत्यपूर्व फेरीत यजमान जपानचा ३-० असा पराभव करून भारताने पदक निश्चित केले होते. त्या सामन्यात लक्ष्य सेन, सात्विक-चिराग आणि आयुष शेट्टी यांनी आपापले सामने जिंकले होते. हाँगझोऊ २०२३ आशियाई क्रीडा स्पर्धेत रौप्यपदक जिंकणाऱ्या भारताने सलग दुसऱ्यांदा पदक पटकावले, मात्र अंतिम फेरीत स्थान मिळवण्यात त्यांना अपयश आले. हाँगझोऊ आशियाई क्रीडा स्पर्धा २०२३ मध्ये, सुवर्णपदकासाठीच्या लढतीत चीनकडून ३-२ अशा फरकाने पराभव पत्करल्यानंतर भारताने रौप्यपदक जिंकले होते.

---------------

हिंदुस्थान समाचार / वृषाली देशपांडे