मॉस्को, 07 सप्टेंबर (हिं.स.)।रशियाच्या उत्तर कॉकसस भागात हिमस्खलनाच्या तडाख्यात ११ जणांचा मृत्यू झाला असून, सहा जण बेपत्ता असल्याचे सांगण्यात येत आहे. खराब हवामानामुळे बचावकार्यात अडथळे निर्माण होत आहेत.

स्थानिक आपत्कालीन सेवांच्या हवाल्याने सोमवारी दिलेल्या माहितीनुसार, रशियाच्या उत्तर कॉकसस भागातील काबार्डिनो-बाल्कारिया प्रदेशात पर्वतारोहकांच्या एका गटातील ११ जण हिमस्खलनाच्या तडाख्यात सापडले. या दुर्घटनेत सहा जण जखमी झाले असून, सहा जण बेपत्ता आहेत. स्थानिक वेळेनुसार रविवारी सायंकाळी सुमारे ५ वाजता बेजेंगी गॉर्ज येथे ही दुर्घटना घडली. ५,०२५ मीटर उंच माउंट मिजिरगीवरून हिमस्खलन खाली आले आणि पर्वतारोहकांच्या ३३ जणांच्या पथकाला त्याने आपल्या कवेत घेतले.

वृत्तसंस्थेनुसार, बचाव पथक आणि एमआय-८ हेलिकॉप्टर घटनास्थळी पाठवण्यात आले. त्यानंतर तीन जणांना सुरक्षितपणे बाहेर काढून नालचिक येथे आणण्यात आले. आपत्कालीन सेवांनी दिलेल्या माहितीनुसार, सोमवारी सकाळी ९ वाजेपर्यंत १० पर्वतारोहक स्वतःहून पर्वतावरून खाली उतरले होते, तर अन्य सहा जणांचा अद्याप ठावठिकाणा लागलेला नव्हता. शोध आणि बचाव मोहिमेत ५० हून अधिक आपत्कालीन कर्मचारी सहभागी झाले होते. मात्र, दुर्गम आणि कठीण भूप्रदेश तसेच पुन्हा हिमस्खलन होण्याचा धोका यामुळे बचावकार्याला अडथळे येत होते. यंदा मोठ्या संख्येने पर्वतारोहकांचा मृत्यू झाल्याची ही दुसरी मोठी घटना आहे.

यापूर्वी पाकिस्तानच्या काराकोरम पर्वतरांगेतील गिलगिट-बाल्टिस्तान भागातील ब्रॉड पीक येथे कॅम्प २ आणि कॅम्प ३ दरम्यान अशीच दुर्घटना घडली होती. ३० जुलै रोजी पाकिस्तानमधील ब्रॉड पीकवर आलेल्या हिमस्खलनाच्या तडाख्यात पर्वतारोहकांचे एक पथक सापडले होते. या दुर्घटनेत जगप्रसिद्ध पर्वतारोही निर्मल पुर्जा (निम्सदाई) यांच्यासह एकूण १० पर्वतारोहकांचा मृत्यू झाला होता. या पथकात निम्स यांच्या नेतृत्वाखाली पाच नेपाळी पर्वतारोहकांचा समावेश होता. इतर सदस्यांमध्ये पाकिस्तान, ओमान, अमेरिका आणि चीनमधील प्रत्येकी एका पर्वतारोहकाचा समावेश होता. ही दुर्घटना जगातील सर्वात भीषण पर्वतारोहण आपत्तींपैकी एक मानली गेली होती.

---------------

हिंदुस्थान समाचार / Priyanka Bansode