वर्धा, 5 ऑक्टोबर (हिं.स.)। महात्मा जोतिराव फुले शेतकरी कर्जमुक्ती योजनेतंर्गत प्रोत्साहनपर लाभ योजनेमध्ये ज्या शेतक-यांनी मागील महिन्यात आधार प्रमाणीकरण केले आहे अशा जिल्ह्यातील 380 शेतक-यांच्या बँक खात्यावर रु. 1 कोटी 86 लाख रक्कम शासनामार्फत जमा करण्यात आली आहे. या योजनेत राज्यातील 11836 शेतक-यांच्या बँक खात्यावर रु. 46 कोटी 70 लाख रक्कम शासनामार्फत जमा करण्यात आली आहे.

यामध्ये यवतमाळ जिल्हयातील 829 शेतक-यांना रु. 352 लाख, जळगांव जिल्हयातील 729 शेतकऱ्यांना रु. 307 लाख, नाशिक जिल्हयातील 713 शेतक-यांना रु. 354 लाख रक्कमेचा लाभ देण्यात आला आहे. या प्रोत्साहनपर लाभ योजनेतंर्गत 33356 शेतक-यांनी आधार प्रमाणीकरण केले नसल्याचे शासनाच्या माहे ऑगस्ट 2024 मध्ये निदर्शनास आले होते. त्यामुळे या शेतक-यांना रुपये 50 हजार पर्यतच्या प्रोत्साहनपर योजनेचा लाभ मिळाला नव्हता. या शेतक-यांना आधार प्रमाणीकरणाची संधी दि. 12 ऑगस्ट 2024 ते 30 सप्टेंबर 2024 या कालावधीत देण्यात आली होती. या कालावधीत आधार प्रमाणीकरण केलेल्या 11836 शेतक-यांच्या बँक खात्यात रु. 46.70 कोटीची प्रोत्साहनपर लाभाची रक्कम 1 ऑक्टोबर 2024 रोजी वर्ग करण्यात आली आहे. यात वर्धा जिल्ह्यातील 380 शेतक-यांच्या बँक खात्यावर रु. 1 कोटी 86 लाख रक्कम शासनामार्फत जमा करण्यात आली.

जे शेतकरी आधार प्रमाणीकरण करण्यापूर्वी मयत झाले आहेत अशा शेतक-यांच्या वारसांची नांवे योजनेच्या पोर्टलवर समाविष्ट करण्याची प्रक्रिया सुरु आहे. या प्रक्रियेनंतर आधार प्रमाणीकरण व योजनेचा लाभ देण्याची कार्यवाही करण्यात येणार आहे.

या योजनेमध्ये सन 2017-18, 2018-19, 2019-20 या तीन वर्षामध्ये कोणत्याही दोन वर्षात बँकेकडून पीक कर्जाची उचल करुन नियमित परतफेड केलेली आहे अशा राज्यातील एकूण 14.50 लाख शेतकऱ्यांना आजपर्यंत एकूण रु. 5310 कोटी रक्कमेचा लाभ देण्यात आला आहे.

हिंदुस्थान समाचार / मेघा माने