रत्नागिरी, 20 ऑक्टोबर, (हिं. स.) : 'खल्वायन रत्नागिरी या संस्थेची वार्षिक दिवाळी पाडवा विशेष संगीत मैफल येत्या बुधवारी, दि. २२ ऑक्टोबर रोजी होणार असून ही मैफल मुग्धा गावकर ही गोव्यातील युवा शास्त्रीय गायिका रंगविणार आहे.

मुग्धा गावकर ही गोवा येथील युवा शास्त्रीय गायिका असून गांधर्व महाविद्यालयाची विशारद परीक्षा विशेष श्रेणीत ती उत्तीर्ण आहे. कोल्हापूर येथील शिवाजी विद्यापीठातून शास्त्रीय संगीतात एम. ए. -सुवर्ण पदक विजेती आहे. मुग्धा बी. कॉम. असून आकाशवाणीची शास्त्रीय, अभंग आणि नाट्यगीतांची ती मान्यताप्राप्त कलाकार आहे. सध्या तिचे भारतीय शास्त्रीय संगीताचे अध्यापन चालू आहे. अभिनव कला मंदिर या संस्थेचे सचिवपद ती सांभाळत आहे. मुग्धाचे सुरवातीचे गायनाचे शिक्षण वयाच्या सहाव्या वर्षापासून पाच वर्षे सौ. विजया नागराळी यांच्याकडे झाले. नंतर दामोदर च्यारी यांच्याकडून तिने ५ वर्षे मार्गदर्शन घेतले. नंतर ७ वर्षे पं. अभिषेकी बुवांचे शिष्य डॉ. लक्ष्मीकांत सहकारी यांच्याकडे संगीताध्ययन तिने केले. गेली ७ वर्षे पुण्यात मेवाती घराण्याचे प्रसिद्ध गायक पं. संजीव अभ्यंकर (पं.जसराज यांचे पट्टशिष्य) यांच्याकडे तिचे विशेष अध्ययन सुरू आहे. 'गोमन्तक सा रे ग म' , गोवा युवा मंच'तर्फे संगीत क्षेत्रातील कामगिरीसाठी युवा गौरव पुरस्कार, बालभवन, गोवा चा गोमंत बालभूषण' इत्यादी पुरस्कारांनी ती सन्मानित आहे. गोव्यातील कला संस्कृती खाते, पुण्यातील पं. जसराज ट्रस्टतर्फे तिला शिष्यवृत्ती मिळाली आहे. स्वरमंगेश संमेलन, गोवा नक्षत्रोत्सव-युवा संमेलन, श्रीमती अंजनीबाई मालपेकर स्मृती समारोह, काणकोण, स्वरसम्राज्ञी गिरिजाताई केळकर स्मृती संगीत संमेलन,फोंडा, शरदरंग महोत्सव, उदयपूर – राजस्थान, युवा प्रतिभोत्सव, मध्य प्रदेश, संगीत अकादमी, दिल्ली, देवल क्लब, कोल्हापूर, स्वरसागर संगीत महोत्सव, पुणे, पं. बाबुराव बानावळी व पं. विश्र्वनाथ गडकर स्मृति संगीत संमेलन, कारवार-कर्नाटक, ताज टी फाउंडेशन, मुंबई; पं. वसंत देसाई युवा संगीत महोत्सव,कुडाळ, बॅनियन ट्री आयोजित युवा संगीत संमेलन, मुंबई, दिवाळी पहाट, बेळगाव, पाडवा पहाट, जळगाव इत्यादी अनेक संमेलनात तिचे शास्त्रीय गायन तसेच सुगम संगीताचेही कार्यक्रम सादर झाले आहेत. प्राची जठार या युवा गायिकेसोबत ‘स्वरसखी’ या अनोख्या शास्त्रीय संगीत सहगायनाच्या मैफिली गोवा व गोव्याबाहेरही तिने सादर केल्या आहेत. गोमंतकीय महिला कलाकारांनी सादर केलेल्या ‘सं. कट्यार काळजात घुसली’ या अजरामर संगीत नाटकामध्ये सदाशिवची भूमिका तिने सादर केली. त्यासाठी तिला गोवा राज्यस्तरीय स्पर्धेत गायक नटाचा प्रथम पुरस्कार प्राप्त झाला. अनेक ध्वनिमुद्रिकांमध्ये तिने गायन केले आहे. मुग्धगंध हा तिचा यू ट्यूब चॅनल आहे.

तिच्या रत्नागिरीतील मैफलीला हार्मोनियम व तबला साथसंगत रत्नागिरीचे प्रसिद्ध वादक चैतन्य पटवर्धन आणि प्रथमेश शहाणे करणार आहेत. तालवाद्य साथ सुहास सोहनी करणार आहेत. मैफल सर्व रसिकांना विनाशुल्क असून सर्व रसिकांनी मैफलीचा आस्वाद घ्यावा, असे आवाहन खल्वायनचे अध्यक्ष मनोहर जोशी यांनी केले आहे. मैफल बुधवारी सायंकाळी पाच ते साडेसात या वेळेत आयोजित करण्यात आली आहे. मे. फिनोलेक्स इंडस्ट्रीजचे प्रायोजकत्व लाभलेली ही मैफल एसटी बसस्थानकासमोरील सौ. गोदुताई जांभेकर विद्यालयात होणार आहे.

---------------

हिंदुस्थान समाचार / रत्नागिरी