काठमांडू, 5 ऑक्टोबर (हिं.स.)।नेपाळमधील कोशी प्रांतात शनिवारी(दि.४) रात्रीपासून सुरू असलेल्या मुसळधार पावसामुळे मोठ्या प्रमाणावर हानी झाली आहे. भीषण पावसामुळे झालेल्या भूस्खलनात किमान १८ लोकांचा मृत्यू झाला आहे. तर इतर काही घटनांतही काही जणांना जीव गमवावा लागला आहे.

कोशी प्रांतीय पोलिस कार्यालयाचे प्रवक्ते एसएसपी दीपक पोखरेल यांनी सांगितले की, आज सकाळपर्यंत, सूर्योदय नगरपालिकामध्ये भूस्खलनामुळे किमान ५ लोकांचा, मंगसेबुंग नगरपालिकामध्ये ३ लोकांचा आणि इलाम नगरपालिकामध्ये ६ लोकांचा मृत्यू झाला आहे. देउमई नगरपालिकामध्ये ३ आणि फक्फोकथुम ग्राम परिषदेत एका व्यक्तीचा मृत्यू झाल्याची माहिती मिळाली आहे. पोखरेल म्हणाले की, मृतांची संख्या अजून वाढू शकते, कारण नुकसानाचे मूल्यांकन सुरू आहे. सध्या आपल्याकडे ही प्राथमिक माहिती आहे.

पोलीस अधिकारी बिनोद घिरमिरे यांनी सांगितले की, दक्षिण नेपाळमध्ये वीज कोसळून ३ जणांचा मृत्यू झाला आहे. तर एक जण पुरात वाहून गेल्याने मरण पावला. इलम जिल्ह्यात झालेल्या वेगवेगळ्या भूस्खलनाच्या घटनांमध्ये १४ लोक मरण पावले आहेत. नेपाळच्या राष्ट्रीय आपत्ती नियंत्रण आणि व्यवस्थापनचे प्रवक्ते शांती महत यांनी सांगितले की, शनिवारी (४ ऑक्टोबर) ११ लोक पुरात वाहून गेले. ते अजूनही बेपत्ता आहेत. त्यांना शोधण्याचे काम युद्ध पातळीवर सुरू आहे.

नेपाळ सेना, सशस्त्र पोलिस दल आणि नेपाळ पोलिस यांना घटनास्थळी तैनात करण्यात आले आहे. नेपाळ सेनेने बचावकार्यांसाठी एक हेलिकॉप्टरही पाठवले आहे. मात्र, खराब हवामानामुळे बचाव कार्यात अडथळे येत आहेत. शनिवारी सकाळपासूनच मुख्य नद्यांच्या किनाऱ्यावर वसलेल्या भागांमध्ये शोध व बचाव मोहीम सुरू करण्यात आली आहे. स्थानिक नागरिकांना सुरक्षित ठिकाणी हलवण्यात येत आहे.

भूस्खलन झाल्यामुळे अनेक ठिकाणी महामार्ग बंद झाले आहेत. काही ठिकाणी पुरामुळे रस्ते वाहून गेले आहेत. त्यामुळे वेगवेगळ्या ठिकाणी हजारो प्रवासी अडकून पडले आहेत. नेपाळमधील विमान सेवाही विस्कळीत झाली आहे. आंतरराष्ट्रीय विमान सेवा सुरू असली, तरी देशांतर्गत विमानसेवा ठप्प झाली आहे, असे काठमांडू विमानतळाचे प्रवक्ते रिन्जी शेरपा यांनी सांगितले.नेपाळच्या सात प्रांतांपैकी पाच प्रांतांमध्ये सध्या सक्रिय मान्सून आहे, ज्यामध्ये कोशी, मधेशी, बागमती, गंडकी आणि लुंबिनी या प्रांतांचा समावेश होतो. हवामान विज्ञान विभागानुसार, बागमती, हनुमंत, मनोहरा, धोबी खोला, विष्णुमती, नक्कु आणि बाल्खु नद्यांचे जलस्तर वाढत आहे. अधिकाऱ्यांनी इशारा दिला आहे की, पूर रस्त्यांपर्यंत पोहोचू शकतो आणि वस्त्यांमध्ये पाणी शिरू शकते.

---------------

हिंदुस्थान समाचार / Priyanka Bansode