भुवनेश्वर, 6 ऑक्टोबर (हिं.स.)। दुर्गा पूजा विसर्जन मिरवणुकीवर दगडफेकीनंतर कटकमधील परिस्थिती तणावपूर्ण आहे. हे लक्षात घेता, आयुक्तालय पोलिसांनी रविवारी रात्री १० वाजता शहरातील १३ पोलीस ठाण्यांच्या परिसरात ३६ तासांची संचारबंदी लागू केली. या भागात दर्गा बाजार, मंगलाबाग, छावणी, पुरी घाट, लालबाग, बिदानसी, मार्कतनगर, सीडीए फेज-२, गुड्स शेड, बदामबाडी जगतपूर, ४२ मौजा आणि सदर पोलीस ठाण्याचा समावेश आहे.

पोलीस आयुक्त एस. देवदत्त सिंह म्हणाले की, परिस्थितीचा सविस्तर आढावा घेतल्यानंतर संचारबंदी लागू करण्याचा निर्णय घेण्यात आला आहे. शांतता भंग करणाऱ्या किंवा संचारबंदीचे उल्लंघन करणाऱ्यांवर कठोर कारवाई केली जाईल, असा इशारा त्यांनी दिला. दरम्यान, ओडिशाचे पोलीस महासंचालक वाय.बी. खुरानिया यांनी रविवारी कटकमधील परिस्थितीचा आढावा घेतला आणि नागरिकांना सहकार्य करण्याचे आवाहन केले. त्यांनी लोकांना पोलिसांच्या वेबसाइटवर उपलब्ध असलेल्या प्रमाणित माहितीवरच अवलंबून राहण्याचा सल्ला दिला. मुख्यमंत्री मोहन चरण माझी यांनी डीजीपींना कटकमध्ये तळ ठोकण्याचा सल्ला दिला आहे.

दरम्यान, ओडिशा सरकारने कटकच्या काही भागात इंटरनेट आणि सोशल मीडिया सेवा तात्पुरत्या स्वरूपात बंद केल्या आहेत. गृह विभागाने सांगितले की, व्हॉट्सॲप, फेसबुक, एक्स, इंस्टाग्राम आणि स्नॅपचॅट सारख्या प्लॅटफॉर्मवर अफवा, प्रक्षोभक आणि दिशाभूल करणारे संदेश पसरवणे थांबवण्यासाठी हे पाऊल उचलण्यात आले आहे. हे उल्लेखनीय आहे की शुक्रवारी रात्री उशिरा शहरातील दर्गा बाजार परिसरात दुर्गा विसर्जन मिरवणुकीदरम्यान दगडफेक झाली. या घटनेत कटकचे पोलिस उपायुक्त ऋषिकेश खिलारी यांच्यासह अनेक जण जखमी झाले होते.

---------------

हिंदुस्थान समाचार / Suraj Chaugule