कॅनबेरा, ८ ऑक्टोबर (हिं.स.) भारताच्या १९ वर्षांखालील संघाने दुसऱ्या युवा कसोटी सामन्यात ऑस्ट्रेलियाच्या १९ वर्षांखालील संघाचा पराभव केला आणि दोन सामन्यांच्या कसोटी मालिकेत २-० असा विजय मिळवला. ग्रेट बॅरियर रीफ अरेना येथे खेळल्या गेलेल्या या सामन्यात भारताने १३ षटकांपेक्षा कमी वेळात ८१ धावांचे लक्ष्य गाठले आणि ७ विकेट्सनी विजय मिळवला. भारताच्या १९ वर्षांखालील संघासाठी हा दौरा अत्यंत यशस्वी ठरला. या संघाने तीन एकदिवसीय आणि दोन कसोटींसह पाचही सामने जिंकले.

वेदांत त्रिवेदीने नाबाद ३३ आणि एक चौकार ठोकून भारताला लक्ष्य गाठण्यास मदत केली. कर्णधार आयुष म्हात्रेने १३, विहान मल्होत्राने २१ आणि राहुल कुमारने नाबाद १३ धावा केल्या. पण, वैभव सूर्यवंशी धाव न घेता बाद झाला. वेदांत त्रिवेदी हा दौऱ्यातील सर्वात यशस्वी फलंदाज होता. त्याने एकदिवसीय सामन्यात १७३ आणि कसोटीत १९८ धावा केल्या. वैभव सूर्यवंशीने कसोटीत १३३ धावा करून दुसऱ्या क्रमांकाची सर्वोत्तम कामगिरी केली आणि एकदिवसीय सामन्यातही १२४ धावा करून तिसरे स्थान पटकावले.

तत्पूर्वी, ऑस्ट्रेलियाने प्रथम फलंदाजी करताना पहिल्या डावात १३५ धावा केल्या. प्रत्युत्तरात, भारताने पहिल्या डावात १७१ धावा करून ३६ धावांची आघाडी घेतली आणि नंतर दुसऱ्या डावात ऑस्ट्रेलियाला ११६ धावांवर गुंडाळले. गोलंदाजीत, नमन पुष्पक आणि हेनिल पटेलने प्रत्येकी तीन विकेट्स घेतल्या. ऑस्ट्रेलियाकडून यष्टीरक्षक अ‍ॅलेक्स ली यंगने सर्वाधिक ३८ धावा केल्या.

---------------

हिंदुस्थान समाचार / वृषाली देशपांडे