नवी दिल्ली, 4 नोव्हेंबर (हिं.स.)लखनऊ सुपर जायंट्सने माजी ऑस्ट्रेलियन अष्टपैलू टॉम मूडी यांना त्यांचे ग्लोबल डायरेक्टर ऑफ क्रिकेट म्हणून नियुक्त केले आहे.या पदावर मूडी केवळ आयपीएलच्या लखनऊ संघाचेच नव्हे तर एसए२० लीगच्या डर्बन सुपर जायंट्स आणि इंग्लंडच्या द हंड्रेड लीगच्या मँचेस्टर संघाचेही पर्यवेक्षण करतील. ते संघाचे सध्याचे मुख्य प्रशिक्षक जस्टिन लँगर आणि अलीकडेच नियुक्त झालेले धोरणात्मक सल्लागार केन विल्यमसन यांच्यासह काम करणार आहेत.

टॉम मूडी यांनी गेल्या दोन दशकांत आंतरराष्ट्रीय आणि फ्रँचायझी क्रिकेटमध्ये अनेक संघांना यश मिळवून दिले आहे. त्यांनी इंग्लंडच्या ओव्हल इनव्हिन्सिबल्सला सलग तिसऱ्यांदा द हंड्रेड लीग विजेतेपद मिळवून दिले आहे. त्यांनी आयएलटी२० लीगच्या डेझर्ट व्हायपर्सचे मुख्य प्रशिक्षक म्हणूनही काम पाहिले आहे. हा संघ त्यांच्या मार्गदर्शनाखाली २०२३ आणि २०२५ मध्ये उपविजेता राहिला होता. त्यांनी २०१३ ते २०१९ दरम्यान सनरायझर्स हैदराबादचे प्रशिक्षक म्हणूनही काम पाहिले. २०२१ मध्ये त्यांची क्रिकेट संचालक म्हणून नियुक्ती झाली. इंग्लंडची सरे काउंटी आणि मुंबई इंडियन्सची मूळ कंपनी रिलायन्स इंडस्ट्रीज लिमिटे देखील मूडी यांना कायम ठेवू इच्छित होते. पण मूडी यांनी एलएसजीला पसंती दिली आहे. टॉम मूडी हे माजी भारतीय वेगवान गोलंदाज झहीर खानची जागा घेतील, जे आयपीएल २०२५ मध्ये संघाचे क्रिकेट ऑपरेशन्स प्रमुख होते. झहीरला दोन वर्षांच्या करारावर स्वाक्षरी करण्यात आली होती. पण केवळ एका हंगामानंतर त्यांनी या संघाला सोडचिठ्ठी दिली. एलएसजीने आपल्या पहिल्या दोन हंगामात (२०२२ आणि २०२३) सलग प्लेऑफमध्ये स्थान मिळवले होते. पण गेल्या दोन वर्षांत त्यांची कामगिरी घसरली आहे. आयपीएल २०२५ मध्ये, संघ सातव्या स्थानावर राहिला, १४ पैकी फक्त सहा सामने जिंकले. संघाने त्यांच्या पहिल्या आठ सामन्यांपैकी पाच जिंकले, तर गेल्या सहा सामन्यांमध्ये त्यांना फक्त एकच विजय मिळवता आला. संघाने त्यांच्या घरच्या मैदानावर, एकाना स्टेडियमवर खेळलेल्या सात सामन्यांपैकी फक्त दोन सामने जिंकले. मूडी १९८७ आणि १९९९ मध्ये ऑस्ट्रेलियाच्या एकदिवसीय विश्वचषक विजेत्या संघांचा भाग होते. त्यांनी २००५-२००७ पर्यंत श्रीलंकेच्या क्रिकेट संघाचे मुख्य प्रशिक्षक म्हणूनही काम केले. त्यांच्या कार्यकाळात, श्रीलंका २००७ च्या विश्वचषकाच्या अंतिम फेरीत पोहोचला होता. पण ऑस्ट्रेलियाने अंतिम फेरीत श्रीलंकेला पराभूत करत विजेतेपद पटकावले होते.

---------------

हिंदुस्थान समाचार / वृषाली देशपांडे