नवी दिल्ली, 14 डिसेंबर (हिं.स.)आयपीएल २०२६ च्या लिलावापूर्वी भारतीय क्रिकेट नियामक मंडळाने (बीसीसीआय) फ्रँचायझींना संशयास्पद गोलंदाजी ऍक्शन असलेल्या गोलंदाजांबद्दल माहिती दिली आहे. दीपक हुड्डा हे या यादीतील एक प्रमुख नाव आहे. गेल्या आयपीएल लिलावापूर्वी तो देखील त्याच यादीत होता. परिणामी हुड्डाचा अष्टपैलू क्रिकेटपटूंच्या श्रेणीत समावेश केला जाऊ शकतो. पण त्याची गोलंदाजी करण्याची शक्यता कमी आहे. या क्रिकेटपटूला चेन्नई सुपर किंग्जने रिलीज केले होते. गेल्या हंगामात त्याने सीएसकेसाठी सात सामने खेळले होते, त्यापैकी एका सामन्यात त्याने एक षटक टाकले होते.

बीसीसीआयने सर्व फ्रँचायझींना संशयास्पद गोलंदाजी ऍक्शन असलेल्या गोलंदाजांबद्दल माहिती दिली आणि गोलंदाजी ऍक्शनवर बंदी घातली. आयपीएल २०२६ चा लिलाव १६ डिसेंबर रोजी अबू धाबी येथे होणार आहे. हुड्डा ऑल-राउंडर १ श्रेणीमध्ये ७५ लाख या मूळ किमतीसह नोंदणीकृत आहे. त्याच्यासोबत या श्रेणीत सात क्रिकेटपटूंचा समावेश आहे. यामध्ये वेंकटेश अय्यर, श्रीलंकेचा वानिंदू हसरंगा आणि न्यूझीलंडचा रचिन रवींद्र यांचा समावेश आहे. लिलावात बोली लावण्यात येणारे फलंदाज पहिले असतील आणि त्यानंतर अष्टपैलू क्रिकेटपटू असतील.

देशांतर्गत क्रिकेटमध्ये राजस्थानकडून खेळणारा हुडा ऑफ-स्पिन देखील गोलंदाजी करतो. देशांतर्गत क्रिकेटमध्ये त्याने ८७ विकेट्स घेतल्या आहेत. त्याने भारतासाठी १० एकदिवसीय आणि २१ टी-२० सामने खेळले आहेत, ज्यामध्ये त्याने एकूण नऊ विकेट्स घेतल्या आहेत. हुडाने आयपीएलमध्ये १० विकेट्स घेतल्या आहेत. त्याने रणजी ट्रॉफीमध्ये एक षटक आणि सय्यद मुश्ताक अली ट्रॉफीमध्ये पाच षटके टाकली आहेत. जर त्याच्या गोलंदाजीच्या ऍक्शनबद्दल पुन्हा प्रश्न उपस्थित झाले तर त्याच्यावर बंदी घातली जाईल.

हुडा व्यतिरिक्त, जम्मू आणि काश्मीरचा फिरकी गोलंदाज आबिद मुश्ताक देखील संशयास्पद गोलंदाजी ऍक्शनच्या यादीत आहे. त्याची मूळ किंमत ३० लाख आहे आणि तो डावखुरा फिरकी गोलंदाज आहे. कर्नाटकचा केएल श्रीजित आणि मध्य प्रदेशचा ऋषभ चौहान यांना आयपीएलच्या गोलंदाजीच्या बंदी यादीत ठेवण्यात आले आहे. २९ वर्षीय श्रीजितवर गेल्या हंगामात बंदी घालण्यात आली होती. यावेळी दोघेही लिलावात सहभागी आहेत आणि यादीतील शेवटच्या क्रिकेटपटूंपैकी आहेत. श्रीजितचा नंतर लिलावाच्या यादीत समावेश करण्यात आला आहे.

---------------

हिंदुस्थान समाचार / वृषाली देशपांडे