रत्नागिरी, 25 एप्रिल, (हिं. स.) : दापोली तालुक्यातील बुरोंडी येथील समुद्रात दुसऱ्या मच्छीमारी नौकांना एलईडी लाइट पुरवणाऱ्या बोटीवर मत्स्यव्यवसाय विभागाकडून गुरुवारी रात्री कारवाई करण्यात आली आहे. या बोटीवर दोन तांडेल आणि दोन खलाशी आढळून आले.

राज्याचे मत्स्यव्यवसाय व बंदरे मंत्री नितेश राणे यांच्या निर्देशानंतर अनधिकृत मासेमारी आणि एलईडी मासेमारीवर मत्स्यव्यवसाय विभागाकडून सातत्याने कारवाई केली जात आहे. त्याचाच एक भाग म्हणून मत्स्यविभागाकडून मिळालेल्या माहितीनुसार गुरुवारी मध्यरात्री म्हणजेच दि. २५ एप्रिल २०२५ रोजी रात्री पाऊण वाजण्याच्या सुमारास बुरोंडी समोर ११.५ सागरी माइल्समध्ये मत्स्यव्यवसाय विभागाच्या अंमलबजावणी अधिकारी दीप्ती साळवी, सहाय्यक मत्स्यव्यवसाय विकास अधिकारी (परवाना अधिकारी, दाभोळ) गस्त घालत होते. यावेळी राज्याच्या जलधी क्षेत्रासाठी परवाना असलेली नझीम अली जांभारकर, (रा. पडवे, ता. गुहागर, जि. रत्नागिरी) यांची नौका (साबीर, नों. क्र. IND-MH-4-MM-493) द्वारे महाराष्ट्रातील जलधी क्षेत्रात बुरोंडीसमोर अनधिकृतरीत्या एल.इ.डी. लाईटचा वापर करताना पकडण्यात आली. या नौकेवर नौका तांडेलसह २ खलाशी होते.

महाराष्ट्र सागरी मासेमारी नियमन अधिनियम 1981 व सुधारणा अधिनियम 2021 अंतर्गत एल.ई. डी. नौकेवर कारवाई करून ती नौका जप्त करून दाभोळ बंदरात ठेवण्यात आली आहे. त्यावर मासळी आढळून आलेली नाही. नौकेवर असणारे लाइट व लाइट पुरवणारी उपकरणे जप्त केली आहेत.

ही कारवाई मत्स्यव्यवसाय सहाय्यक आयुक्त सागर कुवेस्कर व मत्स्यव्यवसाय विकास अधिकारी आनंद पालव यांच्या मार्गदर्शनाखाली अंमलबजावणी अधिकारी श्रीमती दीप्ती साळवी, सहाय्यक मत्स्यव्यवसाय विकास अधिकारी (परवाना अधिकारी, दाभोळ) सागरी सुरक्षा पर्यवेक्षक, सागरी सुरक्षा रक्षक व गस्ती नौका रामभद्रावरील कर्मचारी यांच्या सहकार्याने करण्यात आली आहे.

---------------

हिंदुस्थान समाचार / रत्नागिरी