कोहिमा, १ जून (हिं.स.) : राष्ट्रवादी काँग्रेसचे (एनसीपी) नागालँडमधील सर्व सात आमदार शनिवारी सत्ताधारी नॅशनलिस्ट डेमोक्रॅटिक प्रोग्रेसिव्ह पार्टीत (एनडीपीपी) सामील झाले. ज्यामुळे मुख्यमंत्री नेफ्यू रिओ यांच्या नेतृत्वाखालील पक्षाला 60 सदस्यांच्या विधानसभेत पूर्ण बहुमत मिळाले आहे. या विलीनीकरणामुळे सत्ताधारी आमदारांची संख्या 25 वरून 32 झाली आहे. परिणामी अजित पवार यांच्या पक्षाला मोठा झटका बसला आहे.

शरद पवार यांच्या राष्ट्रवादी काँग्रेस पक्षात फूट पडल्यानंतर, नागालँडमध्ये अजित पवार यांच्या नेतृत्वाखालील राष्ट्रवादी काँग्रेसला स्थानिक नेत्यांनी पाठिंबा दिला होता. 2023 मध्ये झालेल्या विधानसभा निवडणुकीत, एनडीपीपी आणि त्यांचा मित्रपक्ष भाजपनंतर राष्ट्रवादी काँग्रेस राज्यातील तिसरा सर्वात मोठा पक्ष म्हणून उदयास आला आणि त्यांनी 12 जागा जिंकल्या.

विधानसभा अध्यक्ष शारिंगैन लोंगकुमेर यांनी जारी केलेल्या आदेशानुसार, सर्व सात आमदारांनी स्वतः हजर राहून एनडीपीपीमध्ये विलीन होण्याचा निर्णय सांगणारी औपचारिक पत्रे सादर केली. त्यांनी सांगितले की, हे विलीनीकरण संविधानाच्या दहाव्या अनुसूची अंतर्गत संवैधानिक आवश्यकता पूर्ण करते.

राष्ट्रवादी काँग्रेस पक्षाच्या नागालँडमधील सर्व आमदारांनी एनडीपीपीमध्ये प्रवेश केल्यानंतर आता राष्ट्रवादी काँग्रेस पक्षाकडून याची गंभीर दखल घेण्यात आली आहे. पक्षाचे राष्ट्रीय मुख्य प्रवक्ते ब्रिजमोहन श्रीवास्तव यांनी पत्रक काढून कारवाईचे संकेत दिले आहेत. सध्या पक्षाकडून पक्षांतर्गत बंदी कायद्यांतर्गत कशा प्रकारे या आमदारांवर कारवाई करता येईल याची प्रक्रिया सुरू असल्याची माहिती दिली आहे. मागील विधानसभा निवडणुकीत स्थानिक नागरिकांनी राष्ट्रवादी काँग्रेस पक्षाला दिलेल्या जनादेशाचा हा अपमान असून लवकरच आम्ही त्यांची बाजू समजून घेण्यासाठी त्यांच्याशी चर्चा करणार आहोत. कायदेशीर पातळीवर आणि राजकीय पातळीवर आम्ही याप्रकरणी लढाई लढणार आहोत, असंही त्यांनी सांगितलं आहे.

नागालँड विधानसभा सदस्य (पक्षांतराच्या कारणास्तव अपात्रता) नियम, 2019 नुसार, सभापतींनी विलीनीकरणाला मान्यता दिली आणि त्यानुसार पक्ष संलग्नता नोंदी अद्यतनित करण्याचे निर्देश विधानसभा सचिवालयाला दिले, असे आदेशात म्हटले आहे.

राज्यमंत्री केजी केन्ये यांनी पत्रकार परिषदेत सांगितले की, शनिवारी संध्याकाळी राष्ट्रवादी काँग्रेसच्या 7 आमदारांनी विधानसभा अध्यक्षांना त्यांचे विलीनीकरण पत्र सादर केले, जे त्यांनी विनम्रपणे स्वीकारले आहे. यामुळे 14 व्या नागालँड विधानसभेत एनडीपीपी सदस्यांची संख्या 25 वरून 32 झाली आहे. या विलिनीकरणामुळे मुख्यमंत्री आणि सरकारची कामगिरी बळकट होईल, असेही ते म्हणाले.

अजित पवार यांच्या नेतृत्वातील राष्ट्रवादी ही नागालँडमध्ये मुख्य आणि मोठा विरोधी पक्ष होता. आता हे आमदार सत्ताधारी पक्षात गेल्याने या सरकारला कुठलाही धोका उरलेला नाही. यामध्ये नामरी नचांग, के. ए. पोंगशी फोम, पिक्टो शोहे, वाई म्होनबेमो हम्त्सो, वाई मनखाओ कोन्याक, के. एस. तोइहो येप्थो यांचा समावेश आहे.

नागालँडमध्ये पक्षीय बलाबल पाहिल्यास 32 एनडीपीपी आणि 12 भाजप आमदारांव्यतिरिक्त, राज्य विधानसभेत पाच एनपीपी, एलजेपी (रामविलास), नागा पीपल्स फ्रंट आणि आरपीआय (आठवले) चे प्रत्येकी दोन, जेडी(यू) चा एक आणि चार अपक्ष आहेत.

---------------

हिंदुस्थान समाचार / सुधांशू जोशी