मुंबई, 30 ऑगस्ट (हिं.स.)प्रेक्षक बऱ्याच दिवसांपासून अभिनेता सिद्धार्थ मल्होत्रा आणि अभिनेत्री जान्हवी कपूर यांच्या 'परम सुंदरी' चित्रपटाची वाट पाहत होते. हा चित्रपट २९ ऑगस्ट रोजी थिएटरमध्ये प्रदर्शित झाला होता. पण या चित्रपटाला सुरुवातीला अपेक्षित प्रतिसाद मिळाला नाही. हा चित्रपट पहिल्या दिवशी दुहेरी आकडा गाठू शकला नाही. पण रीही या चित्रपटाने वर्षातील अनेक चित्रपटांना मागे टाकले आहे.
'परम सुंदरी'ने रिलीजच्या पहिल्या दिवशी ७.२५ कोटी रुपये कमावले आहेत. ४० ते ५० कोटी रुपयांच्या बजेटमध्ये बनवलेल्या या चित्रपटाने ऍडव्हान्स बुकिंगमधून चांगली कमाई केली होती. त्यामुळे ओपनिंगमध्ये तो सहज १० कोटी रुपये ओलांडेल असा विश्वास होता. पण असे झाले नाही आणि चित्रपट अपेक्षेनुसार कामगिरी करू शकला नाही. तरीही, 'परम सुंदरी'ने 'सैय्यारा' वगळता या वर्षी प्रदर्शित झालेल्या इतर रोमँटिक चित्रपटांपेक्षा चांगली सुरुवात केली आहे.
मागील चित्रपटांवर नजर टाकली तर, सिद्धांत चतुर्वेदी आणि तृप्ती डिमरी यांच्या 'धडक २' ने पहिल्या दिवशी ३.६५ कोटी रुपये कमावले. दुसरीकडे, विक्रांत मेसीच्या 'आँखों की गुस्ताखियां'ने फक्त ३५ लाख रुपये कमावले, तर 'मेट्रो इन दिनोन'ने ४ कोटी रुपये कमावले. मॅडॉक फिल्म्सच्या 'भूल चुक माफ'ने पहिल्या दिवशी ७.२० कोटी रुपये कमावले. दुसरीकडे, रोमँटिक ड्रामा 'मेरे हसबंड की बीवी'ने १.७५ कोटी रुपये आणि जुनैद खानच्या 'लवयापा'ने १.२५ कोटी रुपये कमावले.
सिद्धार्थ मल्होत्रा आणि जान्हवी कपूर दोघांसाठीही 'परम सुंदरी'चे यश खूप महत्त्वाचे आहे. कारण अलिकडच्या काळात त्यांच्या मागील चित्रपटांनी बॉक्स ऑफिसवर फारसा प्रभाव पाडला नव्हता. यावेळीही प्रेक्षकांकडून संमिश्र प्रतिसाद दिसून आला. चित्रपटातील सिद्धार्थ आणि जान्हवीची ऑनस्क्रीन केमिस्ट्री अनेक प्रेक्षकांना प्रभावित करू शकली नाही. विशेषतः जान्हवीच्या अभिनयाबद्दल टीका झाली, तर समीक्षकांचे मत आहे की चित्रपटाची कथा नवीन नाही.
---------------
हिंदुस्थान समाचार / वृषाली देशपांडे
