नवी दिल्ली, १७ जानेवारी (हिं.स.) मेनिंजायटीस या गंभीर आजारातून चमत्कारिकरित्या बरा झाल्यानंतर माजी ऑस्ट्रेलियन क्रिकेटपटू डेमियन मार्टिनने सोशल मीडियावर एक भावनिक पोस्ट शेअर केली. मार्टिनने इंस्टाग्रामवर लिहिले की, २०२६ साठी सज्ज, मी परतलो आहे. त्याने त्याचे कुटुंब, मित्र आणि हितचिंतकांचे आभारही मानले आहेत.

गेल्या महिन्यात डेमियन मार्टिन अचानक आजारी पडला. त्याची प्रकृती बिघडल्यानंतर त्याला ताबडतोब रुग्णालयात दाखल करण्यात आले, जिथे डॉक्टरांनी त्याला मेनिंजायटीस असल्याचे निदान केले होते. उपचारादरम्यान तो एका आठवड्यापेक्षा जास्त काळ कोमात होता.

आपल्या पोस्टमध्ये मार्टिनने लिहिले आहे की, २७ डिसेंबर २०२५ रोजी, जेव्हा माझ्या मेंदूवर मेनिंजायटीसचा हल्ला झाला तेव्हा माझे आयुष्य माझ्यापासून हिरावून घेतले गेले. मला माहित नव्हते की, मला या धोकादायक आजाराशी लढण्यासाठी आठ दिवसांसाठी अर्धांगवायूच्या कोमात ठेवण्यात आले होते आणि मी ते केले.

त्याने पुढे स्पष्ट केले की, डॉक्टरांनी त्याला जगण्याची ५०-५० शक्यता दिली होती. कोमातून बाहेर पडल्यानंतर, तो चालण्यास किंवा बोलण्यास असमर्थ होता. पण फक्त चार दिवसांत, तो केवळ चालण्यास आणि बोलण्यास सुरुवात करू शकला नाही तर डॉक्टरांनाही आश्चर्यचकित केले. त्यानंतर त्याला रुग्णालयातून डिस्चार्ज देण्यात आला आणि आता तो बरा होत आहे.

डेमियन मार्टिनने १९९२ ते २००६ दरम्यान ऑस्ट्रेलियासाठी ६७ कसोटी, २०८ एकदिवसीय आणि चार टी-२० आंतरराष्ट्रीय सामने खेळले आहेत. स्टीव्ह वॉच्या नेतृत्वाखाली तो ऑस्ट्रेलियन कसोटी संघाचा एक महत्त्वाचा आधारस्तंभ होता. त्याने कसोटी क्रिकेटमध्ये १३ शतके झळकावली आहेत.

मार्टिन २००३ च्या एकदिवसीय विश्वचषक जिंकणाऱ्या ऑस्ट्रेलियन संघाचाही भाग होता. भारताविरुद्धच्या अंतिम सामन्यात त्याने नाबाद ८८ धावा केल्या आणि रिकी पॉन्टिंगसोबत सामना जिंकणारी भागीदारी केली. २००६ च्या अ‍ॅशेस मालिकेदरम्यान त्याने आंतरराष्ट्रीय क्रिकेटमधून निवृत्ती घेतली होती. आता गंभीर आजारावर मात केल्यानंतर डेमियन मार्टिनचे पुनरागमन त्याच्या चाहत्यांसाठी आणि क्रिकेट जगतासाठी प्रेरणादायी आहे.

हिंदुस्थान समाचार / वृषाली देशपांडे