ढाका, 05 जानेवारी (हिं.स.) बांगलादेशच्या माजी पंतप्रधान शेख हसीना यांच्याविरोधात देशद्रोहाचा गंभीर खटला सुरू आहे. अंतरिम सरकार अस्थिर करण्यासाठी कट रचल्याचा आरोप त्यांच्यावर करण्यात आला आहे. या प्रकरणात ढाका येथील न्यायालयाने आरोप ठरवण्याच्या सुनावणीसाठी २१ जानेवारी २०२६ ही तारीख निश्चित केली आहे.हे प्रकरण अवामी लीगशी संबंधित असलेल्या ‘जॉय बांग्ला ब्रिगेड’ या गटाच्या एका ऑनलाइन बैठकीशी जोडलेले आहे. या बैठकीत शेख हसीना यांच्यासह शेकडो लोक सहभागी झाल्याचा दावा करण्यात आला आहे.

या प्रकरणात एकूण २८६ जणांवर आरोप असून, हसीना यांच्यासह बहुतांश आरोपी फरार आहेत.

वृत्तांनुसार, डिसेंबर २०२४ मध्ये अवामी लीग आणि शेख हसीना यांचे वडील शेख मुजीबुर रहमान यांच्या वारशाचे कट्टर समर्थक असलेल्या ‘जॉय बांग्ला ब्रिगेड’ या गटाच्या ऑनलाइन बैठकीत हसीना आणि अवामी लीगचे शेकडो सदस्य सहभागी झाले होते. या बैठकीत मोहम्मद युनूस यांच्या नेतृत्वाखालील अंतरिम सरकार सत्तेवरून हटवण्याचा कथित कट रचल्याचा आरोप आहे. सुनावणीनंतर विशेष न्यायाधीश अब्दुस सलाम यांनी शेख हसीना आणि इतर २८५ जणांविरोधात आरोप ठरवण्यासाठी २१ जानेवारीची तारीख निश्चित केली.हे प्रकरण गेल्या वर्षी मार्चमध्ये गुन्हे अन्वेषण विभागाने (CID) दाखल केले होते. त्यानंतर ३० जुलै रोजी २८६ आरोपींची नावे असलेले आरोपपत्र सादर करण्यात आले.

माध्यमांच्या माहितीनुसार, न्यायालयाने १४ ऑगस्ट रोजी आरोपपत्र स्वीकारून आरोपींविरोधात अटक वॉरंट जारी केले. ११ सप्टेंबर रोजी प्रवासबंदी आदेश देण्यात आला, तर १४ ऑक्टोबर रोजी न्यायालयाने वृत्तपत्रांत नोटीस प्रसिद्ध करून शेख हसीना यांच्यासह २६१ फरार आरोपींना न्यायालयात हजर राहण्याचे आदेश दिले.

महत्त्वाचे म्हणजे, गेल्या वर्षी नोव्हेंबरमध्ये हे प्रकरण ढाका मेट्रोपॉलिटन मॅजिस्ट्रेट न्यायालयातून ढाका मेट्रोपॉलिटन सत्र न्यायालयात वर्ग करण्यात आले होते. तसेच, गेल्या वर्षी विद्यार्थ्यांच्या नेतृत्वाखालील आंदोलनांवर सरकारने केलेल्या कठोर कारवाईसाठी शेख हसीना यांना नोव्हेंबरमध्ये एका विशेष आंतरराष्ट्रीय गुन्हे न्यायाधिकरणाने ‘मानवतेविरुद्धच्या गुन्ह्या’ प्रकरणी मृत्युदंडाची शिक्षा सुनावली होती.

उल्लेखनीय म्हणजे, विद्यार्थ्यांच्या हिंसक आंदोलनानंतर ५ ऑगस्ट २०२४ रोजी शेख हसीना बांगलादेश सोडून भारतात गेल्या होत्या. त्याच वर्षी ८ ऑगस्ट रोजी मोहम्मद युनूस यांनी अंतरिम सरकारचे प्रमुख म्हणून कार्यभार स्वीकारला.

---------------

हिंदुस्थान समाचार / Priyanka Bansode