क्वालालंपूर, 05 जानेवारी (हिं.स.)भारतीय बॅडमिंटनपटू मंगळवारपासून सुरू होणाऱ्या मलेशिया ओपन सुपर १००० बॅडमिंटन स्पर्धेतून नवीन हंगामाची सुरुवात करणार आहेत. लक्ष्य सेन आणि पीव्ही सिंधूसारखे स्टार बॅडमिंटनपटू चांगली सुरुवात करण्याचा प्रयत्न करतील. २०२५ हे वर्ष भारतीय बॅडमिंटनपटूंसाठी निराशाजनक ठरले होते. कारण अव्वल बॅडमिंटनपटू दुखापती आणि खराब फॉर्मशी झुंजत होते.

आता सुरुवातीपासूनच चांगली कामगिरी करण्यावर आणि पुढील आठवड्यात दिल्लीत होणाऱ्या इंडिया ओपन सुपर ७५० स्पर्धेची तयारी करण्यावर लक्ष केंद्रित केले जाईल. पॅरिस ऑलिंपिकमध्ये चौथे स्थान मिळवल्यानंतर खराब फॉर्मशी झुंजणाऱ्या वर्ल्ड चॅम्पियनशिप २०२१ कांस्यपदक विजेत्या लक्ष्यने ऑस्ट्रेलियन ओपन सुपर ५०० जिंकून आपला फॉर्म परत मिळवला. लक्ष्य हाँगकाँग ओपनच्या अंतिम फेरीतही पोहोचला. तो सिंगापूरच्या जिया हेंग जेसन तेहविरुद्धच्या त्याच्या पहिल्या सामन्यात तीच गती कायम ठेवण्याचा प्रयत्न करेल.

यूएस ओपन सुपर ३०० विजेता युवा आयुष शेट्टी पहिल्या फेरीत पॅरिस ऑलिंपिक कांस्यपदक विजेत्या मलेशियाच्या ली झी जियाशी सामना करेल. दोन वेळा ऑलिंपिक पदक विजेती सिंधूसाठी गेले वर्ष निराशाजनक राहिले आहे. माजी विश्वविजेती सिंधू पायाच्या दुखापतीमुळे ऑक्टोबरपासून खेळापासून दूर आहे. पहिल्या फेरीत तिचा सामना चायनीज तैपेईच्या सुंग शुओ युनशी होईल.

दुसऱ्यांदा ओडिशा ओपन जिंकणारी उन्नती हुड्डा टोकियो ऑलिंपिक सुवर्णपदक विजेती आणि चौथी मानांकित चीनची चेन यू फीशी होईल. गुडघ्याच्या दुखापतीमुळे सहा महिन्यांच्या विश्रांतीनंतर परतणारी मालविका बनसोड थायलंडच्या माजी विश्वविजेत्या रत्चानोक इंतानोनशी होईल. तिसऱ्या मानांकित सात्विकसाईराज रंकीरेड्डी आणि चिराग शेट्टी यांनी गेल्या वर्षी हाँगकाँग ओपन आणि चायना मास्टर्सच्या अंतिम फेरीत प्रवेश केला आणि दुसऱ्यांदा जागतिक अजिंक्यपद स्पर्धेत कांस्यपदक जिंकले. या भारतीय जोडीचा सामना पहिल्या फेरीत चायनीज तैपेईच्या ली झे हुई आणि यांग पो सुआनशी होणार आहे.

---------------

हिंदुस्थान समाचार / वृषाली देशपांडे