सिडनी, ६ जानेवारी, (हिं.स.) कर्णधार स्टीव्ह स्मिथच्या नाबाद शतकामुळे ऑस्ट्रेलियाने अ‍ॅशेस मालिकेतील पाचव्या आणि शेवटच्या कसोटीवर मजबूत पकड मिळवली आहे. सिडनी क्रिकेट ग्राउंडवर खेळल्या जाणाऱ्या सामन्याच्या तिसऱ्या दिवशी खेळ संपला तेव्हा ऑस्ट्रेलियाने पहिल्या डावात १२४ षटकांत ७ विकेट्स गमावून ५१८ धावा केल्या होत्या. कांगारुंनी इंग्लंडवर १३४ धावांची आघाडी घेतली होती. खेळ संपला तेव्हा कर्णधार स्टीव्ह स्मिथ २०५ चेंडूंत १५ चौकार आणि एका षटकारासह १२९ धावांवर नाबाद होता. त्याच्यासोबत ब्यू वेबस्टर क्रिजवर होता. त्याने ५८ चेंडूंत ४२ धावा केल्या.

ऑस्ट्रेलियाने दिवसाची सुरुवात ६ बाद ३७७ धावांवरुन पुढे खेळण्यास सुरुवात केली. त्यावेळी स्टीव्ह स्मिथ ११५ चेंडूंत ६५ धावांवर आणि कॅमेरून ग्रीन १३ चेंडूंत ८ धावांवर खेळत होते. ऑस्ट्रेलियाने ९८ व्या षटकात ४०० धावा केल्या आणि १०१ व्या षटकात स्मिथ आणि ग्रीन यांच्यातील ५० धावांची भागीदारी संपुष्टात आणली.

१०८ व्या षटकात वेगवान गोलंदाज ब्रायडन कार्सने कॅमेरॉन ग्रीन (६४ चेंडूत ३७ धावा, ३ चौकार, १ षटकार) बाद करून ही भागीदारी मोडली. त्यानंतर स्मिथने डाव स्थिरावला आणि ११० व्या षटकात त्याचे ३७ वे कसोटी शतक पूर्ण केले, १६६ चेंडूत ही कामगिरी केली.

या शतकासह, स्मिथ अ‍ॅशेस इतिहासातील दुसऱ्या क्रमांकाचा सर्वाधिक धावा करणारा फलंदाज बनला आहे. त्याने इंग्लंडचा दिग्गज जॅक हॉब्स (३,६३६ धावा) यांना मागे टाकले. या यादीत ऑस्ट्रेलियन दिग्गज डॉन ब्रॅडमन अव्वल स्थानावर आहेत, ज्यांनी अ‍ॅशेसमध्ये ५,०२८ धावा केल्या. अ‍ॅशेसमधील स्मिथचे हे १३ वे शतक होते, ज्याने जॅक हॉब्स (१२ शतके) यांना मागे टाकले. या विक्रमात त्याला फक्त डॉन ब्रॅडमन (१९ शतके) मागे टाकता आले आहे.

त्यानंतर स्मिथ आणि ब्यू वेबस्टर यांनी ऑस्ट्रेलियाची आघाडी १०० धावांपर्यंत वाढवली. १२१ व्या षटकात स्मिथने जोश टँगच्या गोलंदाजीवर दोन चौकार मारून ऑस्ट्रेलियाला ५०० धावांचा टप्पा ओलांडून दिला. तिसऱ्या दिवसाच्या खेळाच्या शेवटी ऑस्ट्रेलियाने ७ बाद ५१८ धावा केल्या.

तत्पूर्वी, इंग्लंडने नाणेफेक जिंकून प्रथम फलंदाजी करण्याचा निर्णय घेतला आणि त्यांच्या पहिल्या डावात ९७.३ षटकांत ३८४ धावा केल्या. इंग्लंडकडून जो रूटने २४२ चेंडूत १६० धावा केल्या, तर हॅरी ब्रूकने ९७ चेंडूत ८४ धावा केल्या. या दोघांनी चौथ्या विकेटसाठी १६९ धावांची महत्त्वपूर्ण भागीदारी केली. रूट आणि विकेटकीपर-फलंदाज जेमी स्मिथ (४६ धावा) यांनीही ९४ धावांची भागीदारी केली.

हिंदुस्थान समाचार / वृषाली देशपांडे