मुंबई, 03 ऑक्टोबर (हिं.स.)। सप्टेंबर २०२६ मध्ये अनेक नवीन फ्लॅगशिप स्मार्टफोन लाँच झाल्यानंतर आता ऑक्टोबर महिन्यातही स्मार्टफोन बाजारात नव्या मॉडेल्सची रेलचेल पाहायला मिळणार आहे. सणासुदीच्या खरेदीपूर्वी ग्राहकांना नवीन स्मार्टफोनचे पर्याय उपलब्ध होणार असून,
विवो, ओप्पो, मोटोरोलासह वनप्लससारख्या कंपन्या नवे फोन सादर करण्याच्या तयारीत आहेत. यामध्ये दमदार बॅटरी, उच्च दर्जाचे कॅमेरे, वेगवान डिस्प्ले आणि सुधारित प्रोसेसर असलेल्या स्मार्टफोनचा समावेश असण्याची शक्यता आहे.
ओप्पोची एफ३५ मालिका ५ ऑक्टोबरला भारतात लाँच होण्याची शक्यता आहे. एफ३३ मालिकेनंतर कंपनी ही नवी मालिका सादर करणार आहे. या फोनमध्ये सेल्फी फोटोग्राफी, डिझाइन आणि व्हिडिओ सुविधांमध्ये सुधारणा अपेक्षित आहे. ओप्पो एफ३५ प्रोमध्ये ६.७८ इंचांचा १.५के एलटीपीएस ओएलईडी डिस्प्ले, १२० हर्ट्झ रिफ्रेश रेट आणि स्नॅपड्रॅगन ४ जनरेशन ५ प्रोसेसर मिळू शकतो. तसेच, यामध्ये १०,००० एमएएच क्षमतेची बॅटरी दिली जाण्याची शक्यता आहे.
विवोने व्ही८० स्मार्टफोन ६ ऑक्टोबरला भारतात लाँच करण्याची घोषणा केली आहे. या फोनमध्ये झाइसच्या सहकार्याने विकसित केलेला ट्रिपल रिअर कॅमेरा सेटअप मिळू शकतो. यात ऑप्टिकल इमेज स्टॅबिलायझेशनसह ५० मेगापिक्सेलचा मुख्य कॅमेरा, ५० मेगापिक्सेलचा टेलिफोटो कॅमेरा आणि ८ मेगापिक्सेलचा अल्ट्रावाइड कॅमेरा असण्याची शक्यता आहे. सेल्फीसाठी ५० मेगापिक्सेलचा फ्रंट कॅमेरा मिळू शकतो. फोनमध्ये ७,२०० एमएएचची बॅटरी आणि ९० वॅट फास्ट चार्जिंगची सुविधाही अपेक्षित आहे.
विवो एस२ एफई हा स्मार्टफोनही ऑक्टोबरमध्ये दाखल होऊ शकतो. मात्र, कंपनीने अद्याप त्याच्या लाँचची अधिकृत घोषणा केलेली नाही. चर्चेनुसार, यात ६.८३ इंचांचा १.५के एमोलेड डिस्प्ले, १२० हर्ट्झ रिफ्रेश रेट आणि मीडियाटेक डायमेन्सिटी ७३००ई प्रोसेसर मिळू शकतो. यामध्ये १०,००० एमएएचची बॅटरी, ४४ वॅट फास्ट चार्जिंग, ५० मेगापिक्सेलचा मुख्य कॅमेरा आणि ३२ मेगापिक्सेलचा फ्रंट कॅमेरा दिला जाण्याची शक्यता आहे.
दरम्यान, विवो एक्स फोल्ड ६ या प्रीमियम फोल्डेबल स्मार्टफोनचीही चर्चा आहे. यात ८.०२ इंचांचा मुख्य डिस्प्ले, ६.५१ इंचांचा कव्हर डिस्प्ले, दोन्ही ठिकाणी १२० हर्ट्झ रिफ्रेश रेट आणि मीडियाटेक डायमेन्सिटी ९५०० सुपर एडिशन प्रोसेसर मिळण्याची शक्यता आहे. यामध्ये २०० मेगापिक्सेलचा मुख्य कॅमेरा, ५० मेगापिक्सेलचे अल्ट्रावाइड आणि पेरिस्कोप टेलिफोटो कॅमेरे तसेच ७,००० एमएएचची बॅटरी असू शकते.
मोटोरोलाच्या एज ७० निओ या स्मार्टफोनचीही लवकरच बाजारात एंट्री होण्याची शक्यता आहे. हा फोन अँड्रॉइड १७ बीटा साइन-अप पेजवर दिसल्याने चर्चेला सुरुवात झाली आहे. मात्र, यावरून लाँचची तारीख निश्चित होत नाही. या फोनमध्ये स्नॅपड्रॅगन ७एस जनरेशन ३ प्रोसेसर, ६ जीबी रॅम आणि कमी अतिरिक्त अॅप्स असलेला अँड्रॉइड अनुभव मिळू शकतो. या सर्व स्मार्टफोनच्या संभाव्य लाँचमुळे ऑक्टोबरमध्ये ग्राहकांसमोर विविध पर्याय उपलब्ध होण्याची अपेक्षा आहे.
---------------
हिंदुस्थान समाचार / Suraj Chaugule
