मुंबई, 13 नोव्हेंबर, (हिं.स.)। अभिनेता यशचा 'रामायण: भाग १' हा चित्रपट जगभरात १,००० कोटी रुपयांहून अधिक कमाई करणारा चित्रपट ठरला आहे. नितेश तिवारी दिग्दर्शित या पौराणिक महाकाव्याच्या माध्यमातून यशने जागतिक बॉक्स ऑफिसवर आपली प्रचंड लोकप्रियता पुन्हा एकदा सिद्ध केली आहे.

विशेष म्हणजे, 'केजीएफ: चॅप्टर २' नंतर, १,००० कोटी रुपयांचा जागतिक टप्पा ओलांडणारा हा त्याचा दुसरा चित्रपट आहे. या यशासह, यश अशा भारतीय कलाकारांच्या विशेष गटात सामील झाला आहे, ज्यांचे एकापेक्षा जास्त चित्रपट या महत्त्वाच्या टप्प्यापर्यंत पोहोचले आहेत.

'केजीएफ: चॅप्टर २' ने जगभरात सुमारे १,२१५ कोटी रुपयांची कमाई केली होती. 'रामायण'मध्ये रावणाची भूमिका साकारणाऱ्या यशला त्याच्या अभिनयासाठी आणि प्रभावी पडद्यावरील उपस्थितीसाठी (स्क्रीन प्रेझन्स) सर्वत्र प्रशंसा मिळत आहे. या चित्रपटाने भारतात आणि आंतरराष्ट्रीय बाजारपेठेतही उत्कृष्ट कामगिरी केली असून, युके, थायलंड आणि इंडोनेशियासारख्या देशांमध्ये त्याला मोठा प्रतिसाद मिळाला आहे. याव्यतिरिक्त, चित्रपटाच्या कन्नड डब आवृत्तीने ५० कोटी रुपयांचा टप्पा ओलांडून नवा विक्रम प्रस्थापित केला आहे.

यशने नेहमीच भारतीय कथा जागतिक स्तरावर नेण्याबाबत आग्रह धरला आहे. चित्रपट प्रदर्शित होण्यापूर्वीच्या एका कार्यक्रमात त्याने म्हटले होते की, 'रामायण' हे सर्व भारतीयांच्या मूल्ये आणि भावनांशी खोलवर जोडलेले आहे. त्याने असेही सुचवले होते की, अशा प्रकारची कथा पडद्यावर जिवंत करण्यासाठी संपूर्ण भारतीय चित्रपटसृष्टीने एकत्र येणे आवश्यक आहे. या यशासह, यश आता शाहरुख खान, प्रभास आणि रणवीर सिंग यांसारख्या अशा कलाकारांच्या पंक्तीत सामील झाला आहे, ज्यांच्या एकापेक्षा जास्त चित्रपटांनी जगभरात १,००० कोटी रुपयांहून अधिक कमाई केली आहे. 'केजीएफ'पासून 'रामायण'पर्यंतचा त्याचा प्रवास त्याच्या वाढत्या जागतिक प्रभावाचे दर्शन घडवतो.

---------------

हिंदुस्थान समाचार / हर्षदा गावकर