नवी दिल्ली, 02 नोव्हेंबर (हिं.स.)। लवचिक पॅकेजिंग साहित्याचे उत्पादन करणारी आणि ग्राहक वस्तू उद्योगाला तीन थरांचे व पाच थरांचे एलडी फिल्म्स, श्रिंक फिल्म्स, बॅरियर फिल्म्स, प्रिंटेड लॅमिनेट्स तसेच दूध आणि तेलाच्या पिशव्यांचा पुरवठा करणारी कंपनी वेदांत पॉली फॅब्स लिमिटेडचा ५६.६८ कोटी रुपयांचा आयपीओ आज गुंतवणुकीसाठी खुला करण्यात आला. कंपनी प्रामुख्याने व्यवसाय ते व्यवसाय (बीटूबी) या व्यावसायिक प्रारूपावर काम करते. आयपीओ सुरू झाल्यानंतर सकाळी ११.३० वाजेपर्यंत त्याला १८ टक्के प्रतिसाद मिळाला होता.

कंपनीच्या या आयपीओमध्ये गुंतवणूकदार ४ नोव्हेंबरपर्यंत बोली लावू शकतात. इश्यू बंद झाल्यानंतर ५ नोव्हेंबर रोजी समभागांचे वाटप केले जाईल, तर ६ नोव्हेंबर रोजी वाटप झालेले समभाग यशस्वी गुंतवणूकदारांच्या डीमॅट खात्यात जमा केले जातील. याच दिवशी ज्या गुंतवणूकदारांना समभागांचे वाटप झालेले नसेल, त्यांच्यासाठी परताव्याची प्रक्रियाही सुरू केली जाईल. कंपनीचे समभाग ९ नोव्हेंबर रोजी राष्ट्रीय शेअर बाजाराच्या एसएमई मंचावर सूचीबद्ध होण्याची शक्यता आहे.

या आयपीओमध्ये बोली लावण्यासाठी प्रति समभाग ८८ ते ९४ रुपये असा किंमत पट्टा निश्चित करण्यात आला आहे. एका लॉटमध्ये १,२०० समभागांचा समावेश आहे. किरकोळ गुंतवणूकदारांना या इश्यूमध्ये किमान दोन लॉट म्हणजेच २,४०० समभागांसाठी बोली लावता येईल. त्यासाठी त्यांना २,२५,६०० रुपयांची गुंतवणूक करावी लागेल. या आयपीओअंतर्गत १० रुपये दर्शनी मूल्य असलेले एकूण ६०.३० लाख समभाग जारी केले जात आहेत. यापैकी ५१.०१ कोटी रुपये मूल्याचे ५४.२६ लाख नवीन समभाग जारी केले जाणार आहेत. तर प्रवर्तक सेथसावरिया पॉली फॅब एलएलपीकडून ५.६७ कोटी रुपये मूल्याचे ६.०४ लाख समभाग विक्रीसाठी उपलब्ध केले जात आहेत. ही विक्री ऑफर फॉर सेल या प्रक्रियेद्वारे केली जाणार आहे.

या आयपीओमध्ये पात्र संस्थात्मक खरेदीदारांसाठी (क्यूआयबी) एकूण निव्वळ इश्यूच्या १.१९ टक्के हिस्सा राखीव ठेवण्यात आला आहे. याशिवाय किरकोळ गुंतवणूकदारांसाठी सर्वाधिक म्हणजेच ५९.३२ टक्के हिस्सा, तर बिगर संस्थात्मक गुंतवणूकदारांसाठी (एनआयआय) ३९.४९ टक्के हिस्सा राखीव ठेवण्यात आला आहे. या संपूर्ण इश्यूचे बुक रनिंग लीड मॅनेजर म्हणून एफिनिटी ग्लोबल कॅपिटल मार्केट प्रायव्हेट लिमिटेडची नियुक्ती करण्यात आली आहे. तर कॅमिओ कॉर्पोरेट सर्व्हिसेस लिमिटेडला नोंदणी अधिकारी म्हणून नियुक्त करण्यात आले आहे.

आयपीओअंतर्गत समभागांच्या विक्रीतून उभारल्या जाणाऱ्या निधीपैकी २४.६१ कोटी रुपये कंपनीच्या खेळत्या भांडवलाच्या गरजा पूर्ण करण्यासाठी वापरले जाणार आहेत. याशिवाय ६.५१ कोटी रुपये सध्याच्या उत्पादन केंद्रात यंत्रसामग्री खरेदी आणि बसविण्यासाठी भांडवली खर्च म्हणून वापरले जातील. तर ८ कोटी रुपये जुन्या कर्जाचा भार कमी करण्यासाठी खर्च केले जाणार आहेत. उर्वरित निधीचा वापर सर्वसाधारण कॉर्पोरेट उद्देशांसाठी तसेच इश्यूशी संबंधित खर्च भागविण्यासाठी केला जाईल.

वेदांत पॉली फॅब्स लिमिटेडच्या आर्थिक स्थितीबाबत भांडवली बाजार नियामक सेबीकडे सादर करण्यात आलेल्या रेड हेरिंग प्रॉस्पेक्टसमध्ये (आरएचपी) दिलेल्या माहितीनुसार, मागील आर्थिक वर्षांमध्ये चढ-उतार होऊनही कंपनीच्या आर्थिक स्थितीत सुधारणा झाली आहे. आर्थिक वर्ष २०२३-२४ मध्ये कंपनीला ६४ लाख रुपयांचा निव्वळ नफा झाला होता. आर्थिक वर्ष २०२४-२५ मध्ये हा नफा घसरून ४.५६ लाख रुपयांवर आला. मात्र, पुढील आर्थिक वर्ष २०२५-२६ मध्ये कंपनीच्या नफ्यात मोठी वाढ झाली आणि तो १०.९७ कोटी रुपयांवर पोहोचला. चालू आर्थिक वर्ष २०२६-२७ च्या पहिल्या तिमाहीअखेर म्हणजेच ३० जून २०२६ पर्यंत कंपनीने ३.४८ कोटी रुपयांचा निव्वळ नफा नोंदविला होता.

या कालावधीत कंपनीच्या महसुलातही सातत्याने मोठी वाढ झाली. आर्थिक वर्ष २०२३-२४ मध्ये कंपनीला एकूण ४९.७३ कोटी रुपयांचा महसूल मिळाला होता. आर्थिक वर्ष २०२४-२५ मध्ये तो वाढून ८१.५८ कोटी रुपये झाला. त्यानंतर आर्थिक वर्ष २०२५-२६ मध्ये महसुलात ४१ टक्क्यांची वाढ नोंदविण्यात आली आणि तो ११५.३१ कोटी रुपयांवर पोहोचला. चालू आर्थिक वर्ष २०२६-२७ च्या पहिल्या तिमाहीअखेर म्हणजेच ३० जून २०२६ पर्यंत कंपनीला एकूण ३०.४९ कोटी रुपयांचा महसूल मिळाला होता.

या कालावधीत कंपनीच्या विस्ताराबरोबरच तिच्यावरील कर्जाचा भारही सातत्याने वाढल्याचे दिसून आले. आर्थिक वर्ष २०२३-२४ अखेर कंपनीवर एकूण ६.३५ कोटी रुपयांचे कर्ज होते. आर्थिक वर्ष २०२४-२५ मध्ये ते वाढून १३.३२ कोटी रुपये झाले. त्यानंतर आर्थिक वर्ष २०२५-२६ अखेर कंपनीवरील कर्जात मोठी वाढ झाली आणि ते ४६.८२ कोटी रुपयांवर पोहोचले. चालू आर्थिक वर्ष २०२६-२७ च्या पहिल्या तिमाहीअखेर म्हणजेच ३० जून २०२६ पर्यंत कंपनीवर एकूण ४४.८१ कोटी रुपयांचे कर्ज होते.

कंपनीच्या एकूण मालमत्तेतही या काळात सातत्याने वाढ झाली. आर्थिक वर्ष २०२३-२४ अखेर कंपनीची एकूण मालमत्ता १८.८८ कोटी रुपये होती. आर्थिक वर्ष २०२४-२५ मध्ये ती वाढून ५५.४० कोटी रुपये झाली. तर आर्थिक वर्ष २०२५-२६ मध्ये त्यात आणखी वाढ होऊन ती ९७.८० कोटी रुपयांवर पोहोचली. चालू आर्थिक वर्ष २०२६-२७ च्या पहिल्या तिमाहीअखेर म्हणजेच ३० जून २०२६ पर्यंत कंपनीची एकूण मालमत्ता १००.८८ कोटी रुपये नोंदविण्यात आली.

कंपनीच्या राखीव निधी आणि अतिरिक्त निधीमध्येही सातत्याने वाढ झाली आहे. आर्थिक वर्ष २०२३-२४ अखेर कंपनीचा राखीव निधी आणि अतिरिक्त निधी ३.७५ कोटी रुपये होता. आर्थिक वर्ष २०२४-२५ अखेर तो वाढून ४.५७ कोटी रुपये झाला. त्यानंतर आर्थिक वर्ष २०२५-२६ अखेर त्यात मोठी वाढ होऊन तो २७.५३ कोटी रुपयांवर पोहोचला. चालू आर्थिक वर्ष २०२६-२७ च्या पहिल्या तिमाहीअखेर म्हणजेच ३० जून २०२६ पर्यंत हा निधी आणखी वाढून ३०.८८ कोटी रुपये झाला होता.

याच कालावधीत कंपनीच्या निव्वळ संपत्तीतही मोठी वाढ नोंदविण्यात आली. आर्थिक वर्ष २०२३-२४ मध्ये कंपनीची निव्वळ संपत्ती ३.८६ कोटी रुपये होती. आर्थिक वर्ष २०२४-२५ मध्ये ती वाढून १५.४२ कोटी रुपये झाली. आर्थिक वर्ष २०२५-२६ मध्ये त्यात मोठी वाढ होऊन निव्वळ संपत्ती ४२.२६ कोटी रुपयांवर पोहोचली. चालू आर्थिक वर्ष २०२६-२७ च्या पहिल्या तिमाहीअखेर म्हणजेच ३० जून २०२६ पर्यंत कंपनीची निव्वळ संपत्ती ४५.६० कोटी रुपये नोंदविण्यात आली.

त्याचप्रमाणे कंपनीचा व्याज, कर, घसारा आणि कर्जमुक्तीपूर्व नफा (ईबीआयटीडीए) आर्थिक वर्ष २०२३-२४ मध्ये १.२९ कोटी रुपये होता. आर्थिक वर्ष २०२४-२५ मध्ये तो वाढून ७.७४ कोटी रुपये झाला. तर आर्थिक वर्ष २०२५-२६ मध्ये त्यात आणखी वाढ होऊन तो १९ कोटी रुपयांवर पोहोचला. चालू आर्थिक वर्ष २०२६-२७ च्या पहिल्या तिमाहीअखेर म्हणजेच ३० जून २०२६ पर्यंत कंपनीचा ईबीआयटीडीए ६.५९ कोटी रुपये नोंदविण्यात आला होता.

---------------

हिंदुस्थान समाचार / Suraj Chaugule