मुंबई, 02 नोव्हेंबर (हिं.स.)। बॉलिवूडचा सुपरस्टार शाहरुख खान याने आपल्या ६१व्या वाढदिवसानिमित्त चाहत्यांना खास भेट दिली आहे. त्याच्या बहुप्रतीक्षित ‘किंग’ या चित्रपटातील पहिले रोमँटिक गाणे ‘तू मिल जाए’ प्रदर्शित करण्यात आले आहे. या गाण्यात शाहरुखसोबत दीपिका पदुकोण दिसत आहे. व्हिडिओची सुरुवात शाहरुखच्या संवादाने होते. त्यात तो म्हणतो, “मी खुनी नाही, तर प्रेमी आहे आणि माझे लक्ष्य माझी प्रेयसी आहे.” यानंतर दीपिकाचे आगमन होते आणि दोघांमधील रोमँटिक केमिस्ट्री पाहायला मिळते. गाणे प्रदर्शित होताच समाजमाध्यमांवर चाहत्यांच्या प्रतिक्रिया येऊ लागल्या आहेत.

‘तू मिल जाए’ या गाण्याला अरिजित सिंग आणि मधुबंती बागची यांनी आवाज दिला आहे. त्याचबरोबर आंतरराष्ट्रीय गायक एड शिरन यानेही आपल्या आवाजाची जादू दाखवली आहे. गाण्याचे संगीत सचिन-जिगर यांनी तयार केले असून, त्याचे बोल कुमार यांनी लिहिले आहेत. रोमँटिक चालीसोबतच चित्रपटाच्या व्हिडिओमध्ये शाहरुखचा ॲक्शन अवतारही पाहायला मिळतो. अशा प्रकारे या गाण्यात रोमान्स आणि ॲक्शन यांचा रंजक मिलाफ सादर करण्यात आला आहे.

सिद्धार्थ आनंद यांच्या दिग्दर्शनाखाली तयार झालेल्या ‘किंग’ या चित्रपटाबाबत प्रेक्षकांमध्ये आधीपासूनच मोठी उत्सुकता आहे. या चित्रपटात शाहरुख आणि दीपिका यांच्याशिवाय अभिषेक बच्चन आणि सुहाना खान हे देखील महत्त्वाच्या भूमिकांमध्ये दिसणार आहेत. शाहरुख आणि दीपिका या जोडीने यापूर्वीही अनेक चित्रपटांमधून प्रेक्षकांचे मनोरंजन केले आहे. आता ‘तू मिल जाए’ या गाण्यामुळे ही जोडी पुन्हा एकदा चर्चेत आली आहे. हा चित्रपट येत्या २४ डिसेंबर २०२६ रोजी चित्रपटगृहांमध्ये प्रदर्शित होणार आहे.

---------------

हिंदुस्थान समाचार / Suraj Chaugule