नवी दिल्ली, 09 नोव्हेंबर (हिं.स.)। अमेरिकेतील मध्यावधी निवडणुकांच्या निकालांच्या पार्श्वभूमीवर आंतरराष्ट्रीय बाजारात कच्च्या तेलाच्या किमतीतील घसरणीचे सत्र सोमवारीही सुरूच राहिले. सुरुवातीच्या व्यवहारात ब्रेंट क्रूडचा भाव ९६.५२ डॉलर प्रति बॅरल, तर डब्ल्यूटीआय क्रूडचा भाव ९०.१८ डॉलर प्रति बॅरलवर आला आहे.

ऑईल प्राईस डॉट कॉमच्या माहितीनुसार, सध्या सुरुवातीच्या व्यवहारात ब्रेंट क्रूड १.२५ डॉलर म्हणजेच १.१६ टक्क्यांनी घसरून ९६.५२ डॉलर प्रति बॅरलवर व्यवहार करत आहे. वेस्ट टेक्सास इंटरमिजिएट (डब्ल्यूटीआय) क्रूडच्या किमतीतही १.८० टक्क्यांची घसरण होऊन तो ९०.१८ डॉलर प्रति बॅरलवर व्यवहार करत आहे.

तज्ज्ञांच्या मते, गेल्या आठवड्यात एप्रिल २०२० नंतर आंतरराष्ट्रीय बाजारात कच्च्या तेलाच्या किमतीत सर्वात मोठी साप्ताहिक घसरण नोंदवण्यात आली होती. त्यानंतर तेलाच्या किमती आणखी खाली आल्या आहेत. गेल्या आठवड्यात ब्रेंट क्रूडच्या किमतीत १६ टक्क्यांहून अधिक घसरण झाली आहे. ऑक्टोबरच्या अखेरीस सहा महिन्यांच्या सर्वोच्च पातळीवर पोहोचल्यानंतर कच्च्या तेलाच्या किमतीत मोठी घसरण पाहायला मिळाली आहे.

आंतरराष्ट्रीय बाजारात कच्च्या तेलाच्या किमती घसरण्यामागील सर्वात मोठे कारण म्हणजे अमेरिकेत झालेल्या मध्यावधी निवडणुकांचे निकाल हे आहे. या निवडणुकांमध्ये डेमोक्रॅटिक पक्षाला मोठा विजय मिळाल्यानंतर अमेरिका आणि इराण यांच्यात सुरू असलेले युद्ध अधिक तीव्र होणार नाही, असा अंदाज व्यापाऱ्यांनी व्यक्त केला आहे. मात्र, अमेरिकेकडून येणाऱ्या वेगवेगळ्या विधानांमुळे बाजारातील चिंता कायम आहे.

---------------

हिंदुस्थान समाचार / Suraj Chaugule