तेहरान, 26 फेब्रुवारी (हिं.स.)। इराणचे परराष्ट्रमंत्री अब्बास अराघची यांनी गाझामधील इस्रायलच्या लष्करी कारवाईचा तीव्र निषेध केला असून पंतप्रधान नरेंद्र मोदी यांनी इस्रायल दौऱ्यावर असताना पॅलेस्टिनींच्या अधिकारांचा मुद्दा उपस्थित करावा, अशी अपील केली आहे. पंतप्रधान मोदी सध्या दोन दिवसीय इस्रायल दौऱ्यावर आहेत.

अब्बास अराघची यांनी आरोप केला की गाझामधील इस्रायलची कारवाई ही नरसंहारासमान आहे आणि तेहरानला अशा कारवाया करणाऱ्या इस्रायलसोबत संबंध ठेवणे योग्य वाटत नाही. त्यांनी आशा व्यक्त केली की इस्रायलमध्ये असताना पंतप्रधान नरेंद्र मोदी पॅलेस्टिनींच्या हक्कांबाबत आणि त्यांच्या आत्मनिर्णयाच्या अधिकाराबाबतही चर्चा करतील.

एका मुलाखतीत अराघची म्हणाले, “दुर्दैवाने इस्रायलने संपूर्ण गाझा उद्ध्वस्त केले आहे. ७५ हजार लोक मारले गेले आहेत आणि हा केवळ दावा नाही, तर वस्तुस्थिती आहे. गाझा प्रश्नावर काम करणाऱ्या सर्व आंतरराष्ट्रीय संस्थांनी याची पुष्टी केली आहे. हा एक नरसंहार आहे. त्यामुळे अशा नरसंहार करणाऱ्या सत्तेशी संबंध ठेवणे आम्हाला योग्य वाटत नाही. भारतातील आमच्या मित्रांनी स्वतः निर्णय घ्यावा, परंतु मला अपेक्षा आहे की पंतप्रधान नरेंद्र मोदी यांच्या कार्यकाळात पॅलेस्टिनींच्या हक्कांचा आणि त्यांच्या आत्मनिर्णयाच्या अधिकाराचा मुद्दाही विचारात घेतला जाईल.”

इराणचे परराष्ट्रमंत्री यांनी भारत-इराण संबंधांबाबतही भाष्य केले आणि भारताला इराणचा मित्र असल्याचे सांगितले. ते म्हणाले, “भारतासोबतचे आमचे संबंध नेहमीच अत्यंत चांगले राहिले आहेत. भारत हा इराणचा मित्र आहे आणि आमचे नाते ऐतिहासिक आहे. आम्ही नेहमीच द्विपक्षीय आर्थिक, सामाजिक, सांस्कृतिक आणि राजकीय संबंध दृढ ठेवले आहेत. हे संबंध असेच टिकून राहावेत, अशी आमची इच्छा आहे. माझे सहकारी मंत्री एस. जयशंकर यांच्याशीही आमचे उत्तम संपर्क आहेत आणि आम्ही नेहमीच परस्परांशी विचारांची देवाणघेवाण करत असतो. आमचे वैयक्तिक संबंधही अत्यंत चांगले आहेत.”

---------------

हिंदुस्थान समाचार / Priyanka Bansode