नवी दिल्ली, 08 फेब्रुवारी (हिं.स.)। देशभरात सुरू असलेल्या मिशन मोड उपक्रमांतर्गत, भारतीय विशिष्ट ओळख प्राधिकरणाने मोठे यश मिळवले आहे. देशातील 83,000 शाळांमधील विद्यार्थ्यांसाठी एक कोटीहून अधिक अनिवार्य बायोमेट्रिक अद्ययावत नोंदी पूर्ण करण्यात आल्या आहेत. भारतीय अद्वितीय ओळख प्राधिकरणाने शालेय विद्यार्थ्यांसाठी ही विशेष अनिवार्य बायोमेट्रिक अद्ययावत मोहीम सप्टेंबर 2025 मध्ये सुरू केली. यापूर्वी ‘युनिफाइड डिस्ट्रिक्ट इन्फॉर्मेशन सिस्टीम फॉर एज्युकेशन प्लस’ या अनुप्रयोगाशी यशस्वी तांत्रिक एकत्रीकरण करण्यात आले होते. या एकत्रीकरणामुळे शाळांमधील विद्यार्थ्यांच्या ‘एमबीयू’ स्थितीची माहिती पाहणे शक्य झाले आहे.

यूआयडीएआयचे मुख्य कार्यकारी अधिकारी भुवनेश कुमार यांनी सर्व राज्ये आणि केंद्रशासित प्रदेशांच्या मुख्य सचिवांना पत्र लिहून या उपक्रमाची माहिती दिली आणि शाळांमध्ये लक्ष केंद्रीत अनिवार्य बायोमेट्रिक अद्ययावत शिबिरे आयोजित करण्यासाठी सहकार्याची विनंती केली. देशातील सर्व शाळांचा समावेश होईपर्यंत ही मिशन-मोड मोहीम सुरू राहणार आहे. या उपक्रमाचा लाभ आतापर्यंत 83,000 शाळांतील 1 कोटी विद्यार्थ्यांना झाला असून, आणखी अनेक विद्यार्थ्यांना याचा लाभ मिळणार आहे.

‘आधार’ मधील अनिवार्य बायोमेट्रिक अद्ययावत (एमबीयू) नसल्यास विविध शासकीय योजनांचे लाभ घेण्यासाठी आवश्यक प्रमाणीकरण करताना अडचणी येऊ शकतात. तसेच नीट, जेईई , क्यूईटी आदी स्पर्धा व विद्यापीठीय प्रवेश परीक्षांसाठी नोंदणी करतानाही अडथळे निर्माण होऊ शकतात.

मुलांनी अनिवार्य बायोमेट्रिक अद्ययावत पूर्ण करावे आणि ही सेवा सर्वांना सहज उपलब्ध व्हावी, यासाठी यूआयडीएआयने 7 ते 15 वयोगटातील मुलांकडून ‘एमबीयू’साठी आकारले जाणारे शुल्क 1 ऑक्टोबर 2025 पासून एका वर्षासाठी माफ केले आहे. तसेच 5 ते 7 आणि 15 ते 17 वयोगटातील मुलांसाठी एमबीयू सेवा पूर्वीप्रमाणेच मोफत सुरू आहे.

---------------

हिंदुस्थान समाचार / Suraj Chaugule