- कुस्ती खेळताना २९ वर्षांपूर्वी झालेल्या दुखापतीचा त्रास पुन्हा उद्भवला

पुणे, 14 मार्च (हिं.स.) - भाजप नेते आणि केंद्रीय राज्यमंत्री मुरलीधर मोहोळ यांना पायाच्या दुखापतीमुळे रुग्णालयात दाखल करण्यात आलं आहे. कुस्ती खेळताना २९ वर्षांपूर्वी झालेल्या दुखापतीचा त्रास पुन्हा उद्भवल्यामुळे डॉक्टरांनी त्यांना शस्त्रक्रिया करण्याचा सल्ला दिला होता. त्यानुसार नुकतीच मोहोळ यांच्या पायावर ही शस्त्रक्रिया पार पडली. आता त्यांना महिनाभर सक्तीची विश्रांती घ्यावी लागणार आहे.

मुरलीधर मोहोळ यांनी आपल्या आजारपणाबद्दल सोशल मीडियाद्वारे माहिती दिली आहे. मोहोळ यांनी एक्सवर लिहिलेल्या पोस्टमध्ये म्हटलं आहे की, क्षमस्व… पण एक महिन्याची सक्तीची विश्रांती घ्यावी लागणार आहे. कोल्हापूर येथे २९ वर्षांपूर्वी कुस्ती खेळताना झालेली दुखापत आणि या दुखापतीमुळेच कुस्ती कायमची सुटली. मात्र इतकी वर्षे या दुखण्याकडे दुर्लक्ष केलं, पण आता २९ वर्षांनंतर हळूहळू तो त्रास वाढू लागला होता. त्यामुळे शेवटी डॅाक्टरांनी ह्या शस्त्रक्रियेशिवाय पर्याय नसल्याचं मला सांगितलं. त्यानुसार ही शस्त्रक्रिया करण्यात आली, असं त्यांनी सांगितलं आहे. पण मला माहितीये तुमच्या शुभेच्छा आणि आशीर्वादच्या जोरावर मी लवकरच बरा होऊन महिन्याभरातच पहिल्यापेक्षा जास्त जोमाने पुन्हा सर्वांच्या सेवेत हजर होईन असे त्यांनी सांगितले.

शस्त्रक्रियेविषयी अधिक माहिती देताना मोहोळ म्हणाले की, खरंतर संसदेचं अधिवेशन सुरू असतानाही मला पायाची शस्त्रक्रिया करावी लागली. अधिवेशन आणि कामानिमित्त होणारा देशभरातील प्रवास, माझ्या पुणे लोकसभा मतदारसंघातील नागरिकांशी संपर्क आणि इतर कामे. तसंच यंदाची महाराष्ट्र केसरी कुस्ती स्पर्धा… या सगळ्याचं काय? दुखापतीच्या त्रासापेक्षा या सगळ्याचा त्रास जास्त होतोय, अशा भावनाही मंत्री मोहोळ यांनी बोलून दाखवल्या आहेत.

---------------

हिंदुस्थान समाचार / सुधांशू जोशी