लखनऊ, 16 मार्च (हिं.स.)। उत्तर प्रदेशच्या मुरादाबाद जिल्ह्यातील मुंढापांडे पोलीस स्टेशन परिसरात सोमवारी सकाळी दिल्ली-लखनऊ महामार्गावर झालेल्या अपघातात 4 मित्रांचा मृत्यू झाला तर एक गंभीर जखमी झाला. पोलिसांनी मृतदेह शवविच्छेदनासाठी पाठवले आहेत आणि तपास सुरू केला आहे.

पोलीस अधीक्षक (शहर) कुमार रणविजय सिंह यांनी दिलेल्या माहितीनुसार आज, सोमवारी सकाळी ६ वाजता मनकारा वळणाजवळ हा अपघात झाला. रामपूरहून दिल्लीला जाणाऱ्या एका कारचे नियंत्रण सुटले आणि ती मागून येणाऱ्या विटांनी भरलेल्या ट्रॅक्टर-ट्रॉलीला धडकली. धडक इतकी जोरदार होती की कारचा चेंदामेंदा झाला आणि सर्व प्रवासी अडकले. माहिती मिळताच, पोलीस घटनास्थळी पोहोचले आणि त्यांनी बऱ्याच प्रयत्नांनंतर अडकलेल्या प्रवाशांना बाहेर काढले. सर्वांना उपचारासाठी मुंढापांडे येथील सामुदायिक आरोग्य केंद्रात नेण्यात आले, परंतु डॉक्टरांनी चार तरुणांना मृत घोषित केले, तर एका तरुणाची प्रकृती गंभीर असल्याने त्याला जिल्हा रुग्णालयात रेफर करण्यात आले.

शहर पोलीस अधीक्षकांनी सांगितले की, पघातात मृत्युमुखी पडलेल्यांची ओळख पटली आहे. त्यानुसार या अपघातात दयाल सिंह रावत (५८) हे उत्तराखंडमधील नैनिताल येथील रहिवासी आहे, सुंदर सिंह (३५) हे हल्द्वानी येथील रहिवासी आहे, भुवन भंडारी (३८) हे अल्मोडा येथील रहिवासी आहे आणि अनिल नेगी हे देखील हल्द्वानी येथील रहिवासी आहे. या अपघातात कार चालक यशदीप पांडे जखमी झाला असून त्याच्यावर रुग्णालयात उपचार सुरू आहेत. अपघातानंतर ट्रॅक्टर ट्रॉली चालक पळून गेला. पोलिसांनी दोन्ही खराब झालेले वाहने रस्त्यावरून हटवली आणि वाहतूक पूर्ववत करण्यात आली. पोलिस या प्रकरणाचा तपास करत आहेत. मिळालेल्या माहितीनुसार, हे पाचही जण दिल्लीतील एका खाजगी कंपनीत काम करत होते आणि हल्द्वानी येथील एका लग्न समारंभात सहभागी झाल्यानंतर दिल्लीला परतत होते.

---------------

हिंदुस्थान समाचार / Suraj Chaugule