नवी दिल्ली, 21 मार्च (हिं.स.)। दिल्लीमध्ये ईद-उल-फित्रचा सण पूर्ण श्रद्धा आणि उत्साहात साजरा करण्यात आला. आज सकाळी मुस्लिम बांधवांनी नमाज-ए-दोगाना अदा करून जगात शांतता, देशाची प्रगती आणि समृद्धीसाठी विशेष प्रार्थना केली.

ऐतिहासिक शाहजहानी जामा मस्जिद येथे इमाम सैयद अहमद बुखारी यांनी ईदची नमाज अदा करून घेतली. यावेळी मशिदीत मोठ्या संख्येने मुस्लिम बांधवांनी नमाज अदा केली. नमाजनंतर त्यांनी विशेष दुआ केली. मशिदीच्या प्रांगणात, पायऱ्यांवर आणि रस्त्यावरही मोठ्या प्रमाणात लोक नमाज अदा करताना दिसले.

जुन्या दिल्लीतील आणखी एक प्रसिद्ध फतेहपुरी मस्जिद येथे इमाम डॉ. मुफ्ती मुकर्रम अहमद यांनी नमाज अदा करून घेतली. त्यांनी जागतिक स्तरावर वाढत असलेल्या अस्थिरतेचा उल्लेख करत शांततेचे आवाहन केले. तसेच जगात शांतता, देशात समृद्धी आणि प्रगतीसाठी विशेष प्रार्थना केली. येथेही मोठ्या संख्येने लोकांनी नमाज अदा केली.

शाही ईदगाह येथेही ईद-उल-फित्रची नमाज मोठ्या प्रमाणात अदा करण्यात आली. याठिकाणीही मोठ्या संख्येने मुस्लिम बांधव उपस्थित होते. एंग्लो अरेबिक सीनियर सेकेंडरी स्कूल च्या मशिदीतही नमाज अदा करण्यात आली असून नमाज्यांसाठी विशेष सुविधा करण्यात आल्या होत्या. याशिवाय हजरत निजामुद्दीन औलिया दरगाह आणि जामिया मिल्लिया इस्लामिया येथील मशिदींमध्येही मोठ्या संख्येने नमाज अदा करण्यात आली.

जुन्या दिल्लीसह यमुना पार परिसरातील लक्ष्मी नगर, शकरपूर, सीलमपूर, शाहदरा, मुस्तफाबाद, करावल नगर, त्रिलोकपुरी, मयूर विहार, जामिया नगर, बटला हाऊस, बदरपूर, तुघलकाबाद, संगम विहार, मेहरोळी, साकेत, वसंत कुंज, वसंत विहार तसेच बाह्य दिल्लीतील विविध भागांतील मशिदींमध्येही ईदची नमाज मोठ्या श्रद्धेने अदा करण्यात आली.

या प्रसंगी मशिदीबाहेर फुगे, खेळणी आदी वस्तू विकणाऱ्यांची रांग दिसून आली. लहान मुले आनंदाने खरेदी करताना दिसली, ज्यामुळे सणाचा आनंद द्विगुणित झाल्याचे चित्र पाहायला मिळाले.

---------------

हिंदुस्थान समाचार / Suraj Chaugule