लंडन, 22 मार्च (हिं.स.)। मध्य पूर्वेकडे सुरू असलेल्या इराण-अमेरिका-इस्रायल संघर्षाच्या तिसऱ्या आठवड्यात ब्रिटनने ब्रिटिश रॉयल नेव्हीची अणुऊर्जेवर चालणारी पाणबुडी एचएमएस एन्सन अरब सागरात तैनात करण्यात आली आहे. ही पाणबुडी टॉमहॉक क्रूझ क्षेपणास्त्रांनी सज्ज आहे.

लष्करी सूत्रांच्या माहितीनुसार, अणुऊर्जेवर चालणारी एचएमएस एन्सन या महिन्याच्या सुरुवातीला पर्थ येथून रवाना झाली होती आणि सुमारे ५,५०० मैलांचा प्रवास करून या भागात पोहोचली आहे. एचएमएस एन्सन ही ब्रिटनच्या एस्ट्यूट-क्लासमधील पाचवी पाणबुडी असून आतापर्यंतच्या सर्वात मोठ्या, अत्याधुनिक आणि शक्तिशाली आक्रमक पाणबुड्यांपैकी एक मानली जाते.ही पाणबुडी टॉमहॉक ब्लॉक-IV क्रूझ क्षेपणास्त्रे आणि स्पीअरफिश हेवीवेट टॉरपीडो यांनी सुसज्ज आहे. या क्षेपणास्त्रांची मारक क्षमता सुमारे १,६०० किलोमीटर असून त्यामुळे इराणमधील कोणतेही लक्ष्य गाठणे शक्य आहे.

ही पाणबुडी मागील महिन्यात ऑस्ट्रेलियातील पर्थ येथे पोहोचली होती, जिथे ती ऑस्ट्रेलिया-यूके-अमेरिका सुरक्षा भागीदारी अंतर्गत तैनात करण्यात आली होती. मार्चच्या सुरुवातीला ती पर्थहून रवाना झाली आणि सुमारे ५,५०० मैलांचा प्रवास करून अरब सागराच्या उत्तरेकडील खोल पाण्यात पोहोचली आहे. ही तैनाती अशा वेळी करण्यात आली आहे, जेव्हा इराणने होर्मुज सामुद्रधुनी बहुतांश जहाजवाहतुकीसाठी प्रभावीपणे बंद केली आहे. इराणी जहाजांवरील हल्ले आणि सामुद्रधुनी बंद करण्याच्या कारवाईचा ब्रिटनसह २२ देशांनी संयुक्तपणे निषेध केला आहे.

दरम्यान, ब्रिटिश सरकारने अमेरिकेला इराणी ठिकाणांवरील हल्ल्यांसाठी ब्रिटिश तळांचा वापर करण्याची परवानगी देखील दिली आहे. अहवालांनुसार, ही पाणबुडी दर २४ तासांनी पृष्ठभागावर येऊन लंडनमधील परमनंट जॉइंट हेडक्वार्टर्स (पीजेएचक्यू) यांच्याशी संपर्क साधते. कोणताही हल्ला करण्याचा अंतिम आदेश पंतप्रधान कीर स्टार्मर यांच्या मंजुरीनंतरच दिला जाणार आहे.

---------------

हिंदुस्थान समाचार / Priyanka Bansode