इस्लामाबाद , 09 मार्च (हिं.स.)। पाकिस्तानच्या सुरक्षा दलांनी दहशतवाद्यांविरोधात मोठी कारवाई करत विविध चकमकींमध्ये सुमारे २० दहशतवाद्यांना ठार केले आहे. खैबर पख्तूनख्वा प्रांतात सुरक्षा दलांनी पाच वेगवेगळ्या गुप्तचर कारवायांमध्ये १३ दहशतवाद्यांना ठार मारले. पाकिस्तान लष्कराच्या मीडिया विंगने रविवारी सांगितले की, या कारवाया ६ आणि ७ मार्च रोजी राबवण्यात आल्या.

यातील सर्वात मोठी कारवाई बाजौर जिल्ह्यात झाली. येथे भीषण गोळीबारानंतर पाच दहशतवादी ठार करण्यात आले. याशिवाय बन्नू, डेरा इस्माईल खान, खैबर आणि दक्षिण वझिरिस्तान जिल्ह्यांमध्ये झालेल्या चकमकींमध्ये आणखी आठ दहशतवादी मारले गेले.

दरम्यान, पाकिस्तानच्या सुरक्षा दलांनी रविवारी रात्री पंजाब प्रांतात तहरीक-ए-तालिबान पाकिस्तान (टीटीपी) या दहशतवादी संघटनेच्या चार दहशतवाद्यांना ठार केले. पंजाब पोलिसांच्या काउंटर टेररिझम डिपार्टमेंट (सीटीडी) नुसार, पंजाबमधील डेरा गाझी खान जिल्हा मोठ्या दहशतवादी हल्ल्यापासून थोडक्यात वाचला. कारण ‘फितना अल-खवारिज’ (टीटीपी) या संघटनेचे चार दहशतवादी जोतार या सीमावर्ती गावाजवळ सीटीडीसोबत झालेल्या चकमकीत ठार झाले.

सीटीडीने सांगितले की, परिसरात सुमारे १५ दहशतवादी लपून बसल्याची माहिती मिळाल्यानंतर गुप्तचर कारवाई सुरू करण्यात आली होती. हे दहशतवादी डीजी खान येथे पोलिस चेकपोस्ट आणि इतर सरकारी ठिकाणांवर हल्ला करण्याची योजना आखत होते. काउंटर टेररिझम पथक घटनास्थळी पोहोचताच दहशतवाद्यांनी गोळीबार सुरू केला. त्यानंतर सीटीडीच्या जवानांनी प्रत्युत्तरादाखल जोरदार कारवाई केली, ज्यामध्ये चार दहशतवादी ठार झाले. मात्र उर्वरित ११ दहशतवादी अंधाराचा फायदा घेत पळून जाण्यात यशस्वी झाले. दहशतवाद्यांकडून रायफल्स, मोठ्या प्रमाणात दारुगोळा आणि स्फोटक साहित्य जप्त करण्यात आले आहे.

---------------

हिंदुस्थान समाचार / Priyanka Bansode