कोलकाता, 03 एप्रिल (हिं.स.)।पश्चिम बंगालमध्ये 23 आणि 29 एप्रिल रोजी होणाऱ्या विधानसभा निवडणुकांपूर्वी राजकीय वातावरण तापले आहे. दरम्यान, शुक्रवारी मुख्यमंत्री ममता बॅनर्जी यांनी भारतीय जनता पक्षावर गंभीर आरोप केले. मालदामध्ये अलीकडे घडलेली घटना ही राज्यात अस्थिरता निर्माण करण्यासाठी रचलेली सुनियोजित कटकारस्थान असल्याचा आरोप त्यांनी केला. या घटनेसाठी बाहेरून लोकांना आणण्यात आल्याचा दावा त्यांनी केला.

हाजरीपाडा मैदानात आयोजित जनसभेला संबोधित करताना ममता बॅनर्जी म्हणाल्या की, मालदा घटनेची चौकशी सीआयडीकडून सुरू आहे. लोकांना मुंबईतून आणण्यात आले होते आणि संपूर्ण योजना आधीच तयार करण्यात आली होती. जिथे एनआयए आरोपींना पकडण्यात अपयशी ठरली, तिथे राज्याच्या सीआयडीने आरोपींना अटक केली असल्याचे त्यांनी सांगितले. ही घटना त्या वेळी घडली, जेव्हा मोठ्या संख्येने लोक निवडणूक मतदार यादीच्या विशेष सखोल पुनरावलोकन (SIR) विरोधात आंदोलन करत होते. आंदोलकांचा आरोप आहे की सुमारे 1.20 कोटी मतदारांची नावे वगळण्यात आली आहेत किंवा वगळण्याच्या प्रक्रियेत आहेत.

मुख्यमंत्र्यांनी आरोप केला की भाजप या मुद्द्याचा राजकीय फायदा घेण्याचा प्रयत्न करत आहे. निवडणूक आयोगाने केलेल्या मोठ्या प्रमाणातील प्रशासकीय बदलींवरही त्यांनी प्रश्न उपस्थित केले. 506 अधिकाऱ्यांच्या बदलींपैकी 483 बदली केवळ बंगालमधील असून त्यात डीजीपी आणि मुख्य सचिवांसारख्या महत्त्वाच्या पदांचाही समावेश असल्याचे त्यांनी म्हटले.

ममता बॅनर्जी यांनी मतदारांना, विशेषतः महिलांना सतर्क राहण्याचे आवाहन केले. मतदानाच्या दिवशी झाडू घेऊन बाहेर पडावे आणि मतदानाद्वारे उत्तर द्यावे, असे त्यांनी सांगितले. तसेच केंद्रीय सुरक्षा दलांचा, विशेषतः सीआरपीएफचा, वापर भाजपच्या फायद्यासाठी केला जाऊ शकतो, असा आरोपही त्यांनी केला.

दरम्यान, राज्य सीआयडीने बागडोगरा विमानतळावरून वकील आणि माजी एआयएमआयएम उमेदवार मोफक्कारुल इस्लाम याला अटक केली असून त्याला या कटाचा मुख्य आरोपी मानले जात आहे. निवडणूक आयुक्तांच्या निर्देशांनंतर आणि सर्वोच्च न्यायालयाच्या आदेशानुसार एनआयएने या प्रकरणात प्राथमिक चौकशी सुरू केली आहे. सर्वोच्च न्यायालयाने या घटनेला न्यायिक अधिकाऱ्यांना घाबरवण्याचा आणि त्यांच्या कामात अडथळा निर्माण करण्याचा पूर्वनियोजित प्रयत्न असल्याचे म्हटले असून केंद्रीय यंत्रणेकडून चौकशी करण्याचे निर्देश दिले आहेत.लवकरच एनआयएची टीम मालदाला जाऊन तपास सुरू करणार असल्याचे सांगितले जात आहे. स्थानिक पोलिसांनी आतापर्यंत या प्रकरणात 20 जणांना अटक केली असून त्यात आयएसएफ उमेदवार मौलाना शाहजहां अली यांचाही समावेश आहे.

दरम्यान, 294 सदस्यीय पश्चिम बंगाल विधानसभेसाठी मतदान दोन टप्प्यांत 23 आणि 29 एप्रिल रोजी होणार असून मतमोजणी 4 मे रोजी होईल. 2021 च्या निवडणुकीत तृणमूल काँग्रेसने 213 जागांसह मोठा विजय मिळवला होता, तर भाजपला 77 जागा मिळाल्या होत्या. काँग्रेस आणि डाव्या पक्षांना एकही जागा मिळाली नव्हती.

---------------

हिंदुस्थान समाचार / Priyanka Bansode