नवी दिल्ली, 01 मे (हिं.स.)। भारतीय हवामान विभाग (आयएमडी) च्या ताज्या अंदाजानुसार मे महिना देशातील बहुतांश भागांसाठी दिलासा आणि आव्हानांचा मिलाफ ठरणार आहे. एका बाजूला पाश्चिमात्य वाऱ्यांमुळे पावसाची शक्यता अधिक आहे, तर काही राज्यांमध्ये लोकांना सामान्यपेक्षा अधिक उष्णतेच्या लाटांचा सामना करावा लागू शकतो.

मे महिन्यासाठी अंदाज जाहीर करताना भारतीय हवामान विभागाने सामान्यपेक्षा 110 टक्के अधिक पावसाचा अंदाज व्यक्त केला आहे. विभागाने सांगितले की, संपूर्ण देशात सरासरी पावसाचे प्रमाण सामान्यपेक्षा अधिक राहण्याची शक्यता आहे. 1971 ते 2020 या कालावधीतील आकडेवारीनुसार मे महिन्यात सरासरी 61.4 मिमी पाऊस नोंदवला गेला आहे. विभागाच्या मते, देशातील बहुतांश ठिकाणी सामान्यपेक्षा जास्त पाऊस पडेल; मात्र पूर्व आणि ईशान्य भारत तसेच पूर्व-मध्य भारताच्या काही भागांमध्ये पावसाचे प्रमाण सामान्यपेक्षा कमी राहण्याची शक्यता आहे.

दरम्यान, तापमानाबाबत बोलायचे झाल्यास, देशातील बहुतांश राज्यांमध्ये कमाल तापमान सामान्यपेक्षा कमी राहण्याची शक्यता आहे. परंतु मे महिन्यात गंगा मैदानी भाग, पूर्व किनारपट्टीवरील राज्ये, गुजरात आणि महाराष्ट्राच्या काही भागांमध्ये सामान्यपेक्षा अधिक उष्णतेचे दिवस राहण्याची शक्यता आहे. गुजरात, महाराष्ट्र, कर्नाटक, किनारी ओडिशा, पश्चिम बंगाल, तामिळनाडू आणि आंध्र प्रदेशातील काही ठिकाणी उष्णतेच्या लाटा (हीटवेव्ह) सामान्यपेक्षा जास्त दिवस टिकण्याची शक्यता आहे. हिमालयीन राज्यांमध्ये 3-4 दिवस अतिरिक्त हीटवेव्ह राहण्याचा अंदाज असून, मान्सूनदरम्यान एल-नीनो सक्रिय होण्याचा इशाराही देण्यात आला आहे.

तसेच, देशातील बहुतांश भागांमध्ये किमान तापमान सामान्यपेक्षा जास्त राहण्याची शक्यता आहे. मात्र उत्तर-पश्चिम भारतातील अनेक भाग, मध्य भारत, द्वीपकल्पीय प्रदेशातील काही भाग तसेच ईशान्य भारताच्या दक्षिण भागांमध्ये किमान तापमान सामान्य किंवा सामान्यपेक्षा कमी राहण्याची शक्यता आहे.

---------------

हिंदुस्थान समाचार / Suraj Chaugule