ढाका, 12 मे (हिं.स.)ढाका येथे पाकिस्तानविरुद्धच्या दोन सामन्यांच्या कसोटी मालिकेतील पहिला सामना बांगलादेशने १०४ धावांनी जिंकला. २६८ धावांचे लक्ष्य गाठताना पाकिस्तानचा संघ १६३ धावांवर सर्वबाद झाला. अशाप्रकारे बांगलादेशने हा कसोटी सामना १०४ धावांनी जिंकला आणि मालिकेत १-० अशी आघाडी घेतली.

ढाका येथील शेर-ए-बांगला स्टेडियमवर झालेल्या या कसोटीत पाकिस्तानने नाणेफेक जिंकून प्रथम गोलंदाजी करण्याचा निर्णय घेतला. बांगलादेशने आपल्या पहिल्या डावात ४१३ धावा केल्या. मोमिनुल हकने ९१ धावा केल्या. कर्णधार नाझमुल होसेन शांतोने १२ चौकार आणि दोन षटकारांच्या मदतीने १०१ धावांची शानदार खेळी केली. मुशफिकुर रहीमने ७१ धावा केल्या. लिटन दासने ३१ धावा केल्या, तर तस्किन अहमदने १९ चेंडूंमध्ये २८ धावांची धडाकेबाज खेळी केली. पाकिस्तानकडून मोहम्मद अब्बासने पाच बळी घेतले, तर शाहीन आफ्रिदीने तीन बळी घेतले. हसन अली आणि नोमान अली यांनी प्रत्येकी एक बळी घेतला.

४१३ धावांचा पाठलाग करताना पाकिस्तानचा पहिला डाव ३८६ धावांवरच संपला. अजान अवैसने १४ चौकारांच्या मदतीने १०३ धावा केल्या. इमाम-उल-हकनेही ४५ धावा केल्या, तर अब्दुल्ला फजलने ६० धावा केल्या. मोहम्मद रिझवानने ५९ धावा केल्या, तर सलमान आगाने ५८ धावा केल्या. कर्णधार शान मसूदने नऊ धावा केल्या आणि सौद शकील नाबाद राहिला. बांगलादेशकडून मेहिदी हसन मिराजने पाच बळी घेतले. तस्किन अहमद आणि तैजुल इस्लाम यांनी प्रत्येकी दोन बळी घेतले, तर नाहिदने एक बळी घेतला.

पहिल्या डावाच्या आधारावर बांगलादेशने २७ धावांची आघाडी घेतली होती. आपल्या दुसऱ्या डावात, बांगलादेशने नऊ गडी गमावून २४० धावा केल्या आणि डाव घोषित केला. मोमिनुल हकने ५६ धावा केल्या, तर कर्णधार नाझमुल शांतोने ८७ धावा केल्या. मुशफिकुरने २२ धावा आणि मिराजने २४ धावा केल्या. अशाप्रकारे बांगलादेशने एकूण २६७ धावांची आघाडी घेतली आणि पाकिस्तानसमोर २६८ धावांचे लक्ष्य ठेवले. दुसऱ्या डावात पाकिस्तानकडून नोमान अली आणि हसन अली यांनी प्रत्येकी तीन बळी घेतले. शाहीनने दोन बळी आणि अब्बासने एक बळी घेतला.

बांग्लादेशने ठेवलेल्या लक्ष्याचा पाठलाग करताना पाकिस्तानचा दुसरा डाव १६३ धावांवर आटोपला. अब्दुल्ला फजलने सर्वाधिक ६६ धावा केल्या. इतर कोणत्याही फलंदाजाने ५० धावांचा टप्पा ओलांडला नाही. सलमान आगाने २६ धावा केल्या, तर रिझवान आणि अवैसने प्रत्येकी १५ धावा केल्या. या व्यतिरिक्त, इतर कोणत्याही पाकिस्तानी फलंदाजाने दुहेरी आकडा गाठला नाही. बांगलादेशकडून नाहिद राणाने पाच बळी घेतले. तैजुल इस्लाम आणि तस्किन अहमद यांनी प्रत्येकी दोन बळी घेतले. मिराजने एक बळी घेतला. दोन्ही संघांमधील दुसरी कसोटी १६ मे पासून सिल्हेट येथे खेळवली जाणार आहे.

---------------

हिंदुस्थान समाचार / वृषाली देशपांडे