पॅरिस, २५ मे (हिं.स.)सर्बियन टेनिस दिग्गज नोव्हाक जोकोविचने फ्रेंच ओपन २०२६ च्या पहिल्या फेरीत फ्रान्सच्या जिओव्हानी म्पेट्शी-पेरिकार्डला ५-७, ७-५, ६-१, ६-४ असे पराभूत करून, विक्रमी २५ व्या ग्रँडस्लॅम विजेतेपदाच्या आपल्या प्रवासाला शानदार सुरुवात केली.
या विजयासह, नोव्हाक जोकोविचने स्वित्झर्लंडच्या रॉजर फेडररचा विक्रम मागे टाकत, सर्वाधिक ग्रँड स्लॅम एकेरी विजेतेपदे (८२) पटकावणारा टेनिसपटू बनण्याचा मान मिळवला. पण, रोलँड गॅरोस येथील सामन्याच्या सुरुवातीला जोकोविच आपल्या सर्वोत्तम फॉर्ममध्ये दिसला नाही.
फ्रेंच टेनिसपटू जिओव्हानी म्पेट्शी-पेरिकार्डने पहिल्या सेटमध्ये उत्कृष्ट खेळ करत ६-५ अशी आघाडी घेतली आणि नंतर एका जोरदार एसने सेट जिंकला. या विजयासह, तो फ्रेंच ओपनच्या पहिल्या फेरीत जोकोविचविरुद्ध एक सेट जिंकणारा १७ वर्षांतील पहिला टेनिसपटू ठरला.
सामन्यानंतर जोकोविच म्हणाला, जिओव्हानीचे अभिनंदन. मी त्याच्याविरुद्ध पहिल्यांदाच खेळत होतो आणि त्याची सर्व्हिस ओळखणे अविश्वसनीयपणे कठीण होते. माझ्या कारकिर्दीत मी फार कमी खेळाडूंना अशी सर्व्हिस वापरताना पाहिले आहे.
तिसऱ्या मानांकित जोकोविचने दुसऱ्या सेटमध्ये महत्त्वपूर्ण संधी साधत पुनरागमन केले आणि सामना बरोबरीत आणला. त्यानंतर या अनुभवी सर्बियन टेनिसपटूने आपला आक्रमक खेळ दाखवत तिसरा सेट सहज जिंकला. चौथ्या सेटमध्ये मनगट आणि हाताच्या त्रासामुळे जिओव्हानी म्पेत्शी पेरिकार्डला उपचारांची गरज भासली. तो संघर्ष करत राहिला असला तरी, जोकोविचने सामन्यावर नियंत्रण मिळवत ४-३ अशी आघाडी घेतली आणि सलग २२व्यांदा फ्रेंच ओपनची पहिली फेरी जिंकली.
आपल्या विजयानंतर नोव्हाक जोकोविचने प्रेक्षकांना अभिवादन करत म्हटले, इथले वातावरण अप्रतिम होते. मला प्रेक्षकांकडून खूप ऊर्जा मिळाली.
---------------
हिंदुस्थान समाचार / वृषाली देशपांडे
