नवी दिल्ली , 26 जून (हिं.स.)।जपानच्या पंतप्रधान सनाए ताकाइची पुढील आठवड्यात म्हणजेच १ जुलैला तीन दिवसांच्या भारत दौऱ्यावर येणार आहेत. व्यापार, गुंतवणूक, संरक्षण आणि इतर विविध क्षेत्रांतील द्विपक्षीय सहकार्य अधिक बळकट करण्याच्या दृष्टीने हा दौरा महत्त्वाचा मानला जात आहे. भारताच्या परराष्ट्र मंत्रालयाने शुक्रवारी याबाबत माहिती दिली.
परराष्ट्र मंत्रालयाच्या माहितीनुसार, पंतप्रधान नरेंद्र मोदी यांच्या निमंत्रणावरून सनाए ताकाइची १ ते ३ जुलै दरम्यान भारताच्या अधिकृत दौऱ्यावर असतील. या दौऱ्यादरम्यान १६व्या भारत-जपान वार्षिक शिखर परिषदेत त्या सहभागी होणार आहेत.
परराष्ट्र मंत्रालयाने म्हटले आहे की, या शिखर परिषदेमुळे दोन्ही देशांना परस्पर सहकार्याच्या सर्व पैलूंचा आढावा घेण्याची आणि ते अधिक मजबूत करण्यासाठी चर्चा करण्याची संधी मिळेल. तसेच, परस्पर हिताच्या प्रादेशिक आणि जागतिक मुद्द्यांवर विचारांची देवाणघेवाण करण्यासाठीही हे व्यासपीठ महत्त्वाचे ठरणार आहे.
हा सनाए ताकाइची यांचा भारताचा पहिलाच अधिकृत दौरा असेल. परराष्ट्र मंत्रालयाने सांगितले की, ऑगस्ट २०२५ मध्ये झालेल्या १५व्या भारत-जपान वार्षिक शिखर परिषदेसाठी पंतप्रधान नरेंद्र मोदी यांनी टोकियोला दिलेल्या भेटीनंतर हा दौरा होत आहे.हा दौरा भारत आणि जपान यांच्यातील विशेष सामरिक आणि जागतिक भागीदारी अधिक दृढ करण्याच्या दोन्ही देशांच्या सामायिक वचनबद्धतेचे प्रतीक असल्याचे परराष्ट्र मंत्रालयाने नमूद केले आहे.
---------------
हिंदुस्थान समाचार / Priyanka Bansode
