लंडन, 11 जुलै (हिं.स.)२०२६ विम्बल्डन पुरुष एकेरीचे अंतिम स्पर्धक निश्चित झाले आहेत. गतविजेता आणि जागतिक क्रमवारीत अव्वल असलेल्या यानिक सिनरने सात वेळा विम्बल्डन विजेता ठरलेल्या नोव्हाक जोकोविचला सरळ सेट्समध्ये पराभूत करत सलग दुसऱ्या वर्षी अंतिम फेरीत प्रवेश केला. दुसऱ्या उपांत्य सामन्यात, द्वितीय मानांकित जर्मन टेनिसपटू अलेक्झांडर झ्वेरेव्हने ब्रिटिश वाईल्डकार्ड आर्थर फर्डीची प्रभावी कामगिरी संपुष्टात आणत आपल्या पहिल्या विम्बल्डन अंतिम फेरीत प्रवेश केला. गतविजेता सिनर आणि फ्रेंच ओपन विजेता झ्वेरेव्ह आता रविवारी विजेतेपदाच्या सामन्यात आमनेसामने येतील.

अव्वल मानांकित इटालियन टेनिसपटू यानिक सिनरने अनुभवी नोव्हाक जोकोविचला ६-४, ६-४, ६-४ ने मात करत एक मोठा विजय नोंदवला. सिनर संपूर्ण सामन्यात आक्रमक खेळला आणि त्याने जोकोविचला पुनरागमनाची कोणतीही संधी दिली नाही. हा विजय सिनरसाठी विशेष होता, कारण याच वर्षाच्या सुरुवातीला ऑस्ट्रेलियन ओपनच्या उपांत्य फेरीत जोकोविचने त्याला पाच-सेटच्या सामन्यात पराभूत केले होते. सिनरने त्या पराभवाचा बदला घेतला आणि विम्बल्डनच्या अंतिम फेरीत प्रवेश केला. या पराभवामुळे ३९ वर्षीय खेळाडूचे विक्रमी २५ वे ग्रँड स्लॅम विजेतेपद जिंकण्याचे स्वप्नही संपुष्टात आले. दुसरीकडे, फ्रेंच ओपनमधील निराशाजनक कामगिरीनंतर, सिनरने सिद्ध केले की तो पूर्णपणे तंदुरुस्त आहे आणि सलग दुसरे विम्बल्डन विजेतेपद जिंकण्यासाठी एक प्रबळ दावेदार आहे.

पहिल्या उपांत्य फेरीत, द्वितीय मानांकित जर्मन टेनिसपटू अलेक्झांडर झ्वेरेव्हने स्थानिक प्रेक्षकांचा आवडता ब्रिटिश टेनिसपटू आर्थर फेरीला ७-६ (७-०), ६-२, ६-४ असे पराभूत करून आपल्या पहिल्या विम्बल्डन अंतिम फेरीत प्रवेश केला. पहिला सेट अत्यंत रोमांचक होता. फेरीने शौर्याने झुंज देत सामना टाय-ब्रेकपर्यंत नेल होता. पण झ्वेरेव्हने टाय-ब्रेक ७-० ने जिंकून सामन्यावर नियंत्रण मिळवले. त्यानंतर दुसऱ्या आणि तिसऱ्या सेटमध्ये फेरीची शक्तिशाली सर्व्हिस आणि आक्रमक ग्राऊंडस्ट्रोक्स रोखणे अशक्य होते. झ्वेरेव्हने २ तास १४ मिनिटांत सामना जिंकला.

---------------

हिंदुस्थान समाचार / वृषाली देशपांडे