अटलांटा (अमेरिका), ८ जुलै (हिं.स.)फिफा विश्वचषक २०२६ च्या राऊंड ऑफ १६ मध्ये अर्जेंटिनाकडून ३-२ ने पराभव झाल्यानंतर, इजिप्तचे मुख्य प्रशिक्षक हुसाम हसन यांनी पंचगिरी आणि फिफावर गंभीर प्रश्न उपस्थित केले आहेत. त्यांनी आरोप केला की त्यांच्या संघाला अन्यायकारक वागणूक देण्यात आली आणि विद्यमान विश्वविजेत्या अर्जेंटिनाला पक्षपाती निर्णयांचा फायदा झाला.

सामन्यानंतर हुसाम हसन म्हणाले, आम्ही जगातील सर्वात मोठ्या संघांपैकी एकाविरुद्ध खेळलो आणि प्रत्येक विभागात आम्ही वरचढ होतो. पण पंचांवर एकतर्फी दबाव टाकण्यात आला, ज्यामुळे निकाल आमच्या विरोधात गेला. त्यांनी स्पष्ट केले की, इजिप्तने सामन्यापूर्वीच पंच फ्रान्सुआ लेटेक्सियर यांच्या नियुक्तीवर आक्षेप घेतला होता. पराभवानंतर, त्यांनी दावा केला की त्यांच्या संघाला एक स्पष्ट पेनल्टी नाकारण्यात आली आणि दुसरा गोलही अन्यायकारकपणे रद्द करण्यात आला.

हसन म्हणाले की, आम्ही या विजयास पात्र होतो, पण आम्हाला न्याय मिळाला नाही. मैदानावर ना निष्पक्ष खेळ होता, ना आदर. फिफा 'निष्पक्ष खेळा'ची घोषणा देते, पण मैदानावर त्याचा काहीही परिणाम झाला नाही. जर पंचांच्या चुका नसत्या, तर निकाल वेगळा लागला असता. ते पुढे म्हणाले, मी पंचांना सांगितले की हे पूर्णपणे अन्यायकारक आहे. कदाचित त्यांना काहीतरी लपवायचे होते. जे लोक गोष्टी लपवण्याचा प्रयत्न करतात ते अनेकदा यशस्वी होत नाहीत. मी या स्पर्धेतील आणखी सामने पाहणार नाही.

इजिप्तच्या प्रशिक्षकाने फिफाच्या सामन्यांच्या वेळापत्रकावरही प्रश्नचिन्ह उपस्थित केले. ते म्हणाले, दुपारी १२ वाजता सामना घेणे हे फुटबॉलची समज नसल्याचे दर्शवते. खेळाडू जेवणार कधी? जे असे वेळापत्रक बनवतात त्यांना फुटबॉलची समज नाही. राग असूनही, हुसाम हसन यांनी आपल्या संघाचे कौतुक केले. ते म्हणाले, मी फुटबॉलपटूंना सांगितले की मला त्यांचा अभिमान आहे. हा संघ सतत प्रगती करत राहील आणि अधिक मजबूत होईल. मला केवळ माझ्या संघाचाच नव्हे, तर संपूर्ण अरब जगताचा आणि आफ्रिकन फुटबॉलचाही अभिमान आहे.

---------------

हिंदुस्थान समाचार / वृषाली देशपांडे