रांची, 10 ऑगस्ट (हिं.स.) : झारखंड लोकसेवा आयोगाचे (जेपीएससी) माजी अध्यक्ष एल. खियांग्ते यांना कथित परीक्षा गैरप्रकाराच्या प्रकरणात सीआयडीने अटक केली आहे. जेपीएससीच्या चौदाव्या संयुक्त नागरी सेवा पूर्व परीक्षेतील अनियमिततेच्या चौकशीदरम्यान ही कारवाई करण्यात आली आहे.

चौदाव्या संयुक्त नागरी सेवा पूर्व परीक्षेच्या निकालावरून गेल्या काही काळापासून वाद सुरू आहे. परीक्षार्थींनी परीक्षा प्रक्रिया आणि निकालामध्ये कथित अनियमितता झाल्याचा आरोप केला आहे. या प्रकरणी विद्यार्थी सातत्याने आंदोलन करत असून परीक्षा प्रक्रियेत पारदर्शकता आणण्याची मागणी करत आहेत.या प्रकरणाची चौकशी झारखंड सीआयडीकडून केली जात आहे. तपासादरम्यान तपास यंत्रणेच्या पथकाने जेपीएससी मुख्यालयावर छापाही टाकला होता. परीक्षा प्रक्रिया आणि कथित गैरप्रकारांशी संबंधित विविध बाबींची चौकशी सीआयडीकडून केली जात आहे.

दरम्यान, एल. खियांग्ते यांनी नुकताच जेपीएससीच्या अध्यक्षपदाचा राजीनामा दिला होता. त्यांनी ई-मेलद्वारे आपला राजीनामा राजभवनाकडे पाठवला होता. राज्यपाल संतोष कुमार गंगवार यांनी त्यांचा राजीनामा स्वीकारला होता. चौदाव्या संयुक्त नागरी सेवा पूर्व परीक्षेच्या निकालावरून वाद सुरू असतानाच खियांग्ते यांनी अध्यक्षपदाचा राजीनामा दिला होता. आता त्यांच्या अटकेनंतर या प्रकरणातील तपास आणि पुढील कारवाईकडे सर्वांचे लक्ष लागले आहे.--------------------

हिंदुस्थान समाचार / मनीष कुलकर्णी