नवी दिल्ली, 12 ऑगस्ट (हिं.स.)। सेन्सेक्सच्या साप्ताहिक एक्सपायरीच्या एक दिवस आधी भारतीय शेअर बाजारात दिवसभर मोठी उलथापालथ पाहायला मिळाली. पश्चिम आशियातील वाढता तणाव आणि आंतरराष्ट्रीय बाजारात कच्च्या तेलाच्या किमतीत झालेली वाढ यामुळे सुरुवातीपासूनच बाजारावर दबाव राहिला. मात्र, दुपारनंतर झालेल्या जोरदार खरेदीमुळे सेन्सेक्स आणि निफ्टीने नीचांकी पातळीवरून चांगली रिकव्हरी केली. तरीही दोन्ही निर्देशांक लाल निशाण्यातच बंद झाले.
मुंबई शेअर बाजाराचा सेन्सेक्स १०९.०८ अंकांच्या वाढीसह ७८,२६३.३३ अंकांवर उघडला. मात्र, व्यवहार सुरू होताच विक्रीचा दबाव वाढल्याने सेन्सेक्स घसरू लागला. दुपारी सुमारे १२ वाजता तो दिवसाच्या उच्चांकापेक्षा ७६५ अंकांनी घसरून ७७,४९७.९३ अंकांवर पोहोचला. त्यानंतर जवळपास दोन तास बाजार याच पातळीच्या आसपास राहिला. दुपारी दोननंतर खरेदीचा जोर वाढल्याने सेन्सेक्समध्ये सुधारणा झाली. अखेरीस तो १८७.९० अंकांच्या म्हणजेच ०.२४ टक्क्यांच्या घसरणीसह ७७,९६६.३५ अंकांवर बंद झाला.
राष्ट्रीय शेअर बाजाराचा निफ्टी ०.७५ अंकांच्या किरकोळ वाढीसह २४,४७२.४५ अंकांवर उघडला. सुरुवातीला तो २४,४७३.३० अंकांपर्यंत पोहोचला; मात्र त्यानंतर झालेल्या विक्रीमुळे तो २४,२६५.९५ अंकांपर्यंत घसरला. दुपारनंतर झालेल्या खरेदीमुळे निफ्टीने नीचांकी पातळीवरून सुमारे १७० अंकांची रिकव्हरी केली आणि अखेरीस ३५.७५ अंक म्हणजेच ०.१५ टक्क्यांच्या घसरणीसह २४,४३५.९५ अंकांवर बंद झाला.
क्षेत्रीय निर्देशांकांमध्ये बँकिंग, कॅपिटल गुड्स, सार्वजनिक क्षेत्रातील कंपन्या आणि मेटल क्षेत्रात खरेदी दिसून आली. मात्र, आयटी निर्देशांक १.५४ टक्क्यांनी घसरला. एफएमसीजी आणि हेल्थकेअर निर्देशांकातही अनुक्रमे ०.८२ आणि ०.७८ टक्क्यांची घसरण झाली. मिडकॅप निर्देशांक ०.२८ टक्क्यांनी वधारला, तर स्मॉलकॅप निर्देशांक ०.१८ टक्क्यांनी घसरला.
बाजारातील घसरणीमुळे गुंतवणूकदारांच्या संपत्तीत सुमारे १.६२ लाख कोटी रुपयांची घट झाली. बीएसईवर नोंदणीकृत कंपन्यांचे एकूण बाजार भांडवल ४९२.२० लाख कोटी रुपयांवर आले. मंगळवारी ते ४९३.८२ लाख कोटी रुपये होते. दिग्गज कंपन्यांमध्ये हिंडाल्को इंडस्ट्रीज, भारती एअरटेल, एसबीआय, जिओ फायनान्शियल आणि अल्ट्राटेक सिमेंट हे आघाडीचे वाढणारे शेअर ठरले. तर टीसीएस, मॅक्स हेल्थकेअर, अपोलो हॉस्पिटल्स, महिंद्रा अँड महिंद्रा आणि टाटा कन्झ्युमर प्रॉडक्ट्समध्ये घसरण झाली.
---------------
हिंदुस्थान समाचार / Suraj Chaugule
