नवी दिल्ली, 12 सप्टेंबर (हिं.स.)। पंतप्रधान नरेंद्र मोदी यांनी शनिवारी १८व्या ब्रिक्स शिखर परिषदेदरम्यान इथिओपियाचे पंतप्रधान डॉ. अबी अहमद अली यांच्यासोबत द्विपक्षीय बैठक घेतली. दोन्ही नेत्यांनी भारत आणि इथिओपियामधील धोरणात्मक भागीदारी आणखी मजबूत करण्यासह द्विपक्षीय सहकार्याच्या नव्या संधींचा शोध घेण्याबाबत व्यापक चर्चा केली.

बैठकीदरम्यान दोन्ही बाजूंनी आर्थिक सहकार्य, व्यापार, संरक्षण आणि सुरक्षा भागीदारी तसेच क्षमता निर्मितीसह विविध क्षेत्रांतील द्विपक्षीय संबंधांच्या प्रगतीचा आढावा घेतला. परस्पर सहकार्याला आणखी गती देणे तसेच दोन्ही देशांमधील भागीदारी अधिक व्यापक आणि परिणामकारक बनविण्याच्या उपायांवरही नेत्यांनी विचारविनिमय केला.

डिसेंबर २०२५ मध्ये पंतप्रधान मोदी यांच्या इथिओपिया दौऱ्यानंतर दोन्ही देशांमधील संबंध पुढे नेण्यासाठी सुरू असलेल्या प्रयत्नांचा एक भाग म्हणून ही बैठक झाली. या दौऱ्यादरम्यान भारत आणि इथिओपियाने द्विपक्षीय संबंध आणखी मजबूत करण्यासह विविध क्षेत्रांमध्ये सहकार्य वाढविण्यावर भर दिला होता.

पंतप्रधान मोदी आणि डॉ. अबी अहमद यांनी प्रादेशिक तसेच जागतिक महत्त्वाच्या मुद्द्यांवरही विचारांची देवाणघेवाण केली. बहुपक्षीय मंचांवर भारत आणि इथिओपियामधील समन्वय आणि परस्पर सहकार्य आणखी मजबूत करण्याच्या कटिबद्धतेचा दोन्ही नेत्यांनी पुनरुच्चार केला.

पंतप्रधान मोदी यांनी १८व्या ब्रिक्स शिखर परिषदेत इथिओपियाच्या सहभागाचे स्वागत करत त्याचे कौतुक केले. ब्रिक्समध्ये इथिओपियाच्या उपस्थितीमुळे ग्लोबल साउथच्या सामूहिक आवाजाला बळ मिळाले असल्याचे त्यांनी सांगितले. दोन्ही नेत्यांमधील चर्चेमुळे भारत-इथिओपिया संबंध पुढे नेण्यासाठी उच्चस्तरीय राजकीय संवादाची सातत्यपूर्णता अधोरेखित झाली.

---------------

हिंदुस्थान समाचार / Suraj Chaugule