नवी दिल्ली, 15 सप्टेंबर (हिं.स.)। पश्चिम आशियातील वाढता तणाव, कच्च्या तेलाच्या दरातील तेजी, जगभरातील महागाई वाढण्याची शक्यता आणि व्याजदरवाढीची चिंता तसेच जागतिक रोखे परताव्यात झालेली वाढ यामुळे मंगळवारी भारतीय शेअर बाजारात जोरदार घसरण झाली. दिवसभर झालेल्या चौफेर विक्रीमुळे मुंबई शेअर बाजाराचा निर्देशांक सेन्सेक्स ७७७.९४ अंकांनी घसरून ७४,००३.८२ अंकांवर बंद झाला. तर राष्ट्रीय शेअर बाजाराचा निफ्टी २७९.५० अंकांनी घसरून २३,११८.६० अंकांवर स्थिरावला. या घसरणीमुळे शेअर बाजारातील गुंतवणूकदारांच्या संपत्तीत तब्बल १०.६९ लाख कोटी रुपयांची घट झाली.

मंगळवारी बाजाराची सुरुवात मात्र सकारात्मक झाली होती. सेन्सेक्स ५८७.८७ अंकांच्या वाढीसह ७५,३६९.६३ अंकांवर उघडला. सुरुवातीच्या खरेदीमुळे तो ६५४.६८ अंकांनी वाढून ७५,४३६.४४ अंकांच्या दिवसातील उच्चांकी पातळीवर पोहोचला. मात्र, त्यानंतर जागतिक बाजारातील नकारात्मक वातावरणाचा परिणाम भारतीय बाजारावरही झाला आणि विक्रीचा दबाव वाढू लागला. सकाळी दहा वाजण्याच्या सुमारास सेन्सेक्सने आपली सुरुवातीची सर्व वाढ गमावली आणि तो घसरणीच्या दिशेने गेला. दिवसभर विक्रीचा दबाव कायम राहिल्याने व्यवहाराच्या अखेरीस सेन्सेक्स दिवसाच्या उच्चांकी पातळीवरून १,४४२.४१ अंकांनी घसरला.

निफ्टीची सुरुवातही १७८.०५ अंकांच्या वाढीसह २३,५७६.१५ अंकांवर झाली. सुरुवातीच्या खरेदीमुळे निफ्टी १९४.७५ अंकांनी वाढून २३,५९२.८५ अंकांच्या उच्चांकी पातळीवर पोहोचला. मात्र, जागतिक दबावामुळे विक्रीचा जोर वाढला आणि पहिल्याच तासात निफ्टी घसरणीच्या पातळीवर आला. त्यानंतर खरेदीदारांनी बाजाराला आधार देण्याचा प्रयत्न केला, मात्र मंदीच्या दबावामुळे तो निष्फळ ठरला. अखेर निफ्टी दिवसाच्या उच्चांकी पातळीवरून ४७४.२५ अंकांनी घसरला.

क्षेत्रीय निर्देशांकांमध्ये माहिती-तंत्रज्ञान क्षेत्राने तुलनेने चांगली कामगिरी केली. निफ्टी माहिती-तंत्रज्ञान निर्देशांक २.१९ टक्के, तर बीएसई तंत्रज्ञान निर्देशांक १.०६ टक्क्यांनी वाढला. दुसरीकडे, स्थावर मालमत्ता क्षेत्राला मोठा फटका बसला. स्थावर मालमत्ता निर्देशांक तीन टक्क्यांहून अधिक घसरला. धातू निर्देशांक २.१२ टक्के, सार्वजनिक क्षेत्रातील उद्योग निर्देशांक २.२९ टक्के आणि ग्राहक टिकाऊ वस्तू निर्देशांक २.६५ टक्क्यांनी घसरले. वाहन, पायाभूत सुविधा, तेल-गॅस, औषधनिर्मिती, भांडवली वस्तू आणि एफएमसीजी क्षेत्रांचे निर्देशांकही लाल निशाणात बंद झाले. व्यापक बाजारात निफ्टी मध्यम आकाराच्या कंपन्यांचा निर्देशांक २.१२ टक्के आणि छोट्या कंपन्यांचा निर्देशांक २.४३ टक्क्यांनी घसरला.

बीएसईवर नोंदणीकृत कंपन्यांचे बाजार भांडवल शुक्रवारी ४८३.१० लाख कोटी रुपये होते. मंगळवारी ते घटून ४७२.४१ लाख कोटी रुपये झाले. त्यामुळे गुंतवणूकदारांच्या संपत्तीत एका दिवसात सुमारे १०.६९ लाख कोटी रुपयांची घट झाली. मोठ्या कंपन्यांमध्ये एचसीएल टेक्नॉलॉजी, इन्फोसिस, टीसीएस, टेक महिंद्रा आणि विप्रो हे वाढीसह बंद झाले. तर भारत इलेक्ट्रॉनिक्स, श्रीराम फायनान्स, अदाणी एंटरप्रायझेस, इंटरग्लोब एव्हिएशन आणि ग्रासिम इंडस्ट्रीज यांच्या समभागांत मोठी घसरण झाली.

---------------

हिंदुस्थान समाचार / Suraj Chaugule