दुबई, ३ सप्टेंबर (हिं.स.) : श्रीलंकेची कर्णधार चमारी अथापथ्थूच्या भेदक गोलंदाजीच्या जोरावर श्रीलंकेने इंडोनेशियाचा ७५ धावांनी पराभव करत महिला आशिया कप २०२६ स्पर्धेतील सलग दुसरा विजय नोंदवला. श्रीलंकेने दिलेल्या १२५ धावांच्या लक्ष्याचा पाठलाग करताना इंडोनेशियाचा डाव अवघ्या ४९ धावांत आटोपला.

अथापथ्थूने अवघ्या ३.३ षटकांत ५ धावा देत ७ बळी घेतले. तिच्या या शानदार कामगिरीमुळे इंडोनेशियाचा डाव पूर्णपणे कोलमडला. अथापथ्थूने सामन्यात हॅट्ट्रिकची नोंद करत श्रीलंकेच्या विजयावर शिक्कामोर्तब केले. ७ धावांत ५ बळी ही महिलांच्या टी-२० आंतरराष्ट्रीय क्रिकेटमधील सर्वोत्तम गोलंदाजी कामगिरींपैकी एक ठरली आहे.

सिल्वाच्या अर्धशतकामुळे श्रीलंकेला सावरता आले

नाणेफेक जिंकून इंडोनेशियाने प्रथम गोलंदाजी करण्याचा निर्णय घेतला. इंडोनेशियाच्या गोलंदाजांनी सुरुवातीला श्रीलंकेच्या फलंदाजांवर चांगलाच दबाव निर्माण केला. त्यामुळे श्रीलंकेची अवस्था ६२ धावांत ६ गडी अशी झाली होती.मात्र, नीलाक्षिका सिल्वाने संयमी आणि आक्रमक फलंदाजी करत श्रीलंकेचा डाव सावरला. तिने ३५ चेंडूंत तीन चौकार आणि एका षटकाराच्या मदतीने ५० धावांची अर्धशतकी खेळी केली. तिच्या या खेळीच्या जोरावर श्रीलंकेने २० षटकांत ७ गडी गमावत १२४ धावा उभारल्या आणि इंडोनेशियासमोर १२५ धावांचे लक्ष्य ठेवले.

अथापथ्थूच्या माऱ्यासमोर इंडोनेशिया ढेपाळला

लक्ष्याचा पाठलाग करताना इंडोनेशियाच्या फलंदाजांना श्रीलंकेच्या गोलंदाजांसमोर फार काळ टिकता आले नाही. अथापथ्थूने सुरुवातीपासूनच आक्रमक मारा करत इंडोनेशियाच्या फलंदाजीचा कणा मोडला. तिने पॉवरप्लेमध्ये सलामीवीर मारिया कोराझोन आणि रहमावती पंगेस्तुती यांना बाद केले. त्यानंतर इंडोनेशियाची कर्णधार नी पुतू आयु नंदा सकारिनीलाही तिने माघारी पाठवले.

अथापथ्थूच्या सात बळींच्या कामगिरीला काव्या कविंदी, सुगंधिका कुमारी आणि कविशा दिलहरी यांनी प्रत्येकी एका बळीची जोड दिली. परिणामी इंडोनेशियाचा संपूर्ण संघ १८.३ षटकांत केवळ ४९ धावांत सर्वबाद झाला.या विजयासह श्रीलंकेने महिला आशिया कप २०२६ मध्ये सलग दुसरा विजय मिळवला असून, 'ब' गटातील आपली स्थिती मजबूत केली आहे.00000000000000000000000

हिंदुस्थान समाचार / वृषाली देशपांडे