ढाका, 05 सप्टेंबर (हिं.स.)। बांगलादेशात गोवरचा प्रादुर्भाव दिवसेंदिवस गंभीर होत चालला आहे. देशात मार्चपासून आतापर्यंत गोवर आणि गोवरसारखी लक्षणे असलेल्या 987 जणांचा मृत्यू झाला आहे, तर गेल्या 24 तासांतच 1,114 संशयित रुग्ण आढळून आले आहेत. मृतांमध्ये मोठ्या संख्येने मुलांचा समावेश आहे. आरोग्य विभागाच्या आकडेवारीनुसार, हा प्रादुर्भाव गेल्या अनेक दशकांतील देशातील सर्वात गंभीर गोवर संकटांपैकी एक बनला आहे.

बांगलादेशची सरकारी वृत्तसंस्था बांगलादेश संगबाद संस्था (बीएसएस) तसेच तैवानची राष्ट्रीय वृत्तसंस्था सेंट्रल न्यूज एजन्सी (सीएनए) यांनी आरोग्य सेवा महासंचालनालय (डीजीएचएस)च्या हवाल्याने सांगितले की, 15 मार्चपासून आतापर्यंत संशयित गोवरामुळे 888 मुलांचा मृत्यू झाला आहे. तर कन्फर्म गोवरमुळे मृत्यू झालेल्यांची संख्या 99 आहे. गेल्या 24 तासांत कन्फर्म गोवरमुळे कोणत्याही मृत्यूची नोंद झालेली नाही. सरकारी आकडेवारीनुसार, 15 मार्चपासून आतापर्यंत गोवरचे 1,62,262 संशयित रुग्ण आढळून आले आहेत. यापैकी 19,567 प्रकरणे कन्फर्म झाली आहेत. गेल्या 24 तासांत 40 नवीन कन्फर्म रुग्णांची नोंद झाली आहे. या कालावधीत 1,42,453 संशयित रुग्णांना रुग्णालयात दाखल करण्यात आले, त्यापैकी 1,37,350 रुग्ण उपचारानंतर बरे होऊन घरी परतले आहेत.

राजधानी ढाक्यातील बालरुग्णालयांमध्ये गोवरने संक्रमित आणि संशयित रुग्णांची संख्या वाढल्याने आरोग्य व्यवस्थेवरील दबाव वाढला आहे. रुग्णालयातील गोवर वॉर्डमध्ये मोठ्या संख्येने लहान मुले दाखल आहेत आणि अनेक रुग्णांना श्वास घेण्यास गंभीर त्रास होत असल्याने ऑक्सिजनची गरज भासत आहे. रुग्णालयात दाखल असलेल्या सहा महिन्यांच्या अयान या मुलाला सुरुवातीला न्यूमोनियामुळे दाखल करण्यात आले होते. त्यानंतर त्याला गोवरची लागण झाली. डॉक्टरांच्या मते, आधीच कमकुवत फुफ्फुसे आणि कुपोषणामुळे त्याची प्रकृती अधिक गंभीर झाली. त्याला अनेक दिवस ऑक्सिजन सपोर्टवर ठेवण्यात आले.

डॉक्टरांचे म्हणणे आहे की, सध्याच्या प्रादुर्भावात सहा महिने ते पाच वर्षे वयोगटातील मोठ्या संख्येने मुले प्रभावित झाली आहेत. अनेक मुलांमध्ये कुपोषणही आढळून आले आहे, ज्यामुळे त्यांची रोगप्रतिकारक शक्ती कमकुवत होते आणि गोवरच्या गुंतागुंतीचा धोका वाढतो.

गोवर हा अत्यंत संसर्गजन्य विषाणूजन्य आजार आहे, जो प्रामुख्याने खोकणे आणि शिंकण्यामुळे पसरतो. गंभीर प्रकरणांमध्ये यामुळे न्यूमोनिया, श्वास घेण्यास त्रास आणि मेंदूला सूज येण्यासारख्या गुंतागुंती होऊ शकतात. तज्ज्ञांच्या मते, गोवरविरुद्धच्या लसीकरणात झालेली घट हे सध्याच्या संकटाच्या प्रमुख कारणांपैकी एक आहे. 2024 मध्ये प्रस्तावित लसीकरण मोहिमेला राजकीय उलथापालथीमुळे विलंब झाला, तर 2025 च्या मोहिमेवरही संप आणि अस्थिरतेचा परिणाम झाला.

सरकारने आता मोठ्या प्रमाणावर लसीकरण मोहीम सुरू केली आहे. अधिकाऱ्यांच्या म्हणण्यानुसार, ज्या मुलांना निर्धारित वेळेत गोवरची लस मिळू शकली नाही, अशा मुलांची ओळख पटवून त्यांना लस दिली जात आहे. महामारीतज्ज्ञ आणि इन्स्टिट्यूट ऑफ एपिडेमिओलॉजी, डिसीज कंट्रोल अँड रिसर्च (आयईडीसीआर)चे माजी संचालक महमूदुर रहमान यांनी गोवरवर नियंत्रण मिळवण्यासाठी आणखी मोठ्या प्रमाणावर लसीकरण मोहीम राबवण्याची गरज व्यक्त केली आहे. त्यांनी लोकांमध्ये जनजागृती वाढवण्यासोबतच संक्रमित मुलांना वेगळे ठेवणे, नियमितपणे हात धुणे आणि मुलांची देखभाल करणाऱ्यांनी मास्कचा वापर करणे यांसारख्या उपायांवरही भर दिला.

आरोग्यविषयक बाबींसाठी पंतप्रधानांचे विशेष सहाय्यक एसएम जियाउद्दीन हैदर यांनी सध्याच्या परिस्थितीला “भयावह” म्हटले आहे. त्यांनी सांगितले की, ज्या मुलांना यापूर्वी लसीची आवश्यक मात्रा मिळू शकली नाही, अशा मुलांपर्यंत पोहोचण्याचा आरोग्य कर्मचारी प्रयत्न करत आहेत. बांगलादेशातील गोवरचा वाढता प्रादुर्भाव आता सरकार आणि आरोग्य व्यवस्थेसाठी मोठे आव्हान बनले आहे. दररोज एक हजारांहून अधिक संशयित रुग्ण समोर येत असताना, संसर्गाचा वेग रोखण्यासाठी जलद लसीकरण, सुरुवातीच्या टप्प्यातील उपचार आणि प्रभावी देखरेख अत्यंत आवश्यक असल्याचे तज्ज्ञांचे मत आहे.

---------------

हिंदुस्थान समाचार / Suraj Chaugule