मोकी, चीन, ५ सप्टेंबर (हि.स.) भारतीय ज्युनियर पुरुष हॉकी संघाने एएचएफ ज्युनियर आशिया कप २०२६ मध्ये विजयी सलामी दिली आहे. पूल 'अ' च्या सलामीच्या लढतीत भारताने इंडोनेशियाचा १४-० ने धुव्वा उडवला. पाच वेळच्या विजेत्या संघाने संपूर्ण सामन्यात आपले वर्चस्व कायम ठेवले.
भारतासाठी प्रभदीप सिंग सर्वात यशस्वी ठरला, त्याने पाच गोल केले आणि त्याला सामनावीर म्हणून गौरवण्यात आले. कर्णधार अनमोल एक्काने चार गोल केले, तर अजित यादवने हॅट-ट्रिक पूर्ण केली. हरपाल आणि आशु मौर्य यांनी प्रत्येकी एक गोल केला.
भारताने सुरुवातीपासूनच आक्रमक पवित्रा घेतला. पाचव्या मिनिटाला प्रभदीपने गोल करून खाते उघडले, तर आठव्या मिनिटाला हरपालने आघाडी दुप्पट केली. पहिल्या क्वार्टरच्या अखेरीस भारताने २-० अशी आघाडी घेतली होती.
दुसऱ्या क्वार्टरमध्ये, १६ व्या मिनिटाला अनमोलने पेनल्टी स्ट्रोकचे गोलमध्ये रूपांतर करून स्कोअर ३-० केला. २० व्या मिनिटाला अजित यादवने आणखी एक गोल केला. त्यानंतर प्रभदीपने २६ व्या आणि ३० व्या मिनिटाला गोल करून आपली हॅट-ट्रिक पूर्ण केली, ज्यामुळे मध्यंतरापर्यंत भारताला ६-० अशी भक्कम आघाडी मिळाली.
तिसऱ्या क्वार्टरमध्येही भारताचे वर्चस्व कायम राहिले. ३५ व्या आणि ४२ व्या मिनिटाला अनमोलने पेनल्टी कॉर्नरचे गोलमध्ये रूपांतर केले. त्यानंतर क्वार्टर संपण्यापूर्वी प्रभदीपने आणखी एक गोल करून भारताची आघाडी ९-० पर्यंत वाढवली.
भारतीय संघाने अंतिम क्वार्टरमध्ये आणखी पाच गोल केले. ५१ व्या मिनिटाला अनमोलने आपला चौथा गोल केला, तर पुढच्याच मिनिटाला प्रभदीपने आपला पाचवा गोल केला. ५३ व्या मिनिटाला दोन गोल करून अजित यादवने आपली हॅट-ट्रिक पूर्ण केली. ५९ व्या मिनिटाला आशु मौर्याने पेनल्टी कॉर्नरचे गोलमध्ये रूपांतर करून भारताला १४-० असा दणदणीत विजय मिळवून दिला.
---------------
हिंदुस्थान समाचार / वृषाली देशपांडे
