कोल्हापूर, 12 ऑक्टोबर (हिं.स.) - गुरु गोरक्षनाथ शिखर येथील गोरक्षनाथ मंदिरातील ५० किलो वजनाची मूर्तीची नुकतीच काही समाजकंटकांनी तोडफोड केली, तसेच पूजेचे साहित्य विस्कटून टाकले. याच समवेत मूर्ती उंचावरून खाली टाकून दिली. यापूर्वीही समाजकंटकांनी अनेक वेळा तिथे अशांती निर्माण करण्याचा प्रयत्न केला आह. तरी अशा लोकांवर त्वरित कारवाई करण्यात यावी, यामागणीसाठी दत्तभक्तांनी मिरजकर तिकटी ते लक्ष्मीपुरी येथील दत्तमंदिरापर्यंत निषेध पदयात्रा काढली. फेरीत महिला मोठ्या संख्येने सहभागी होत्या.

या संदर्भात अधिक माहिती देतांना श्री. मंगेश लेले म्हणाले, ‘‘गुजरात राज्यातील जुनागढ येथील गिरनार पर्वतावर हिमालयापेक्षा प्राचीन अशा ठिकाणी दत्त महाराजांचे अक्षय निवासस्थान अहे. या पवित्र स्थानावर अनंत काळापासून श्री दत्त महाराज तपस्या करत होते. तरी अशा ठिकाणी करण्यात आलेली तोडफोड हे नियाजनद्ध कृती असून समाजात धार्मिक तेढ निर्माण करणे, मंदिरांची तोडफोड करणे यांसाठी कडक कायदा झाला पाहिजे. या संदर्भात आम्ही उद्या जिल्हाधिकारी यांना निवेदन देणार आहोत.’’

या प्रसंगी सर्वश्री स्वरूप मालवणकर, दिनेश घबाडे, भालचंद्र उकीडवे, निखिल वडगावकर, शुभम लोहार, हिंदु जनजागृती समितीचे श्री. शिवानंद स्वामी, राष्ट्रीय बजरंग दलाचे शहराध्यक्ष श्री. अक्षय ओतारी, हिंदू महासभेचे श्री. नंदकुमार घोरपडे यांसह सर्व नाथ संप्रदाय, सर्व दत्त भक्त संप्रदाय, स्वामी समर्थ भक्त संप्रदाय यांचे भक्त उपस्थित होते.

---------------

हिंदुस्थान समाचार / सुधांशू जोशी